پاکستان پیپلزپارٹی کے مرکزی سیکریٹری اطلاعات سینیٹر مولا بخش چانڈیو نے کہا ہے کہ شہید بی بی کے دور میں کسی کو سیاسی انتقام میں جیل میں نہیں رکھا گیا۔

تفصیلات کے مطابق شہید بی بی کی بارہویں برسی پر پاکستان پیپلزپارٹی کے مرکزی سیکریٹری اطلاعات سینیٹر مولا بخش چانڈیو نے اپنے ایک  پیغام میں کہا کہ پی پی پی کا ہر دور وفاق اور صوبوں کے حقوق کیلئے سنہری دور رہا کیونکہ محترمہ شہید کا سیاسی اور  ذاتی انتقام میں یقین نہیں رکھتی تھیں۔

پاکستان پیپلزپارٹی کے مرکزی سیکریٹری اطلاعات سینیٹر نے کہا کہ محترمہ بینظیر بھٹو شہید کو صدیاں روئیں گی اور زمانے یاد کریں گے کیونکہ  عوام کا وفاق سے اعتماد ختم کرنے کیلئے اور  جمہوریت کا مستقبل تاریک کرنے کیلئے بھٹو کے خاندان کو شہید کیا گیا۔

مولا بخش چانڈیو نے یہ بھی کہا کہ بھٹو خاندان نے جانیں قربان کیں مگر عوام کا جمہوریت اور وفاق سے اعتماد ختم ہونے نہیں دیا  اور یہی وجہ ہے کہ محترمہ بینظیر بھٹو شہید  کے قتل کے بارہ برس بعد بھی صرف قاتل ہی نہیں  بلکہ جمہوریت کا ہر دشمن محترمہ شہید کے نام سے خوفزدہ ہے۔

ذلت اور رسوائی حکمران ٹولے کا مقدر بن چکی ہے، مولابخش چانڈیو

اپنے پیغام میں پاکستان پیپلزپارٹی کے مرکزی سیکریٹری اطلاعات سینیٹر  کا کہنا تھا کہ آج بھی ہمارے قائد بلاول بھٹو ہی ہیں جو حالات کی پرواہ کئے بنا جمہوریت کی بات کر رہے ہیں۔

پاکستان پیپلزپارٹی کے مرکزی سیکریٹری اطلاعات سینیٹر مولا بخش چانڈیو کا مزید کہنا تھا کہ جمہوریت دشمن ہمارے نظریے، قیادت  اور کارکنوں کے قربانی کے جذبے سے خوفزدہ ہیں جبکہ بلاول بھٹو زرداری جمہوریت کا مستقبل اور جمہوریت دشمنوں کے خوف کا نیا نام ہے۔

وا ضح رہے کہ اس سے قبل بھی  مرکزی ترجمان پیپلز پارٹی سینیٹر مولابخش چانڈیو نے اپنے ایک بیان میں کہا  تھا کہ وزیراعظم اور ان کے مشیر حالات اپنے دعووں کے برعکس دیکھ کر بوکھلا گئے ہیں، وقت فیصلہ دے چکا ہے کہ یہ حکمران عزت کے ساتھ نہیں جائیں گے۔

سیکریٹری اطلاعات پی پی پی نے  یہ بھی کہا تھا کہ حکومت نے قوم کو بیروزگاری، بھوک اور افلاس کے حوالے کر دیا ہے جبکہ وزرا کی بیہودہ گفگتو بتا رہی ہے کہ حکومت کے آخری دن آ چکے ہیں۔