نقیب اللہ قتل کیس  کی سماعت کرنے والے فاضل جج کی مدت ملازمت ختم ہونے کی وجہ سے کیس کا ٹرائل رک گیا۔ 

تفصیلات کے مطابق جج کی مدت ملازمت ختم ہونے کے بعد متعلقہ اے ٹی سی میں دوسرا جج تعینات نہیں کیا جاسکا۔

نقیب اللہ قتل کیس کی آخری بار سماعت بارہ مارچ کو ہوئی تھی جبکہ ملزمان کے بیان اور وکلا کے حتمی دلائل ہونا باقی ہیں۔

واضح رہے کہ نقیب اللہ سمیت چار افراد کو جعلی پولیس مقابلے میں قتل کیا گیا تھا جبکہ کیس میں چار مرکزی ملزم پولیس اہلکار مفرور ہیں۔

مقدمے میں سابق ایس ایس بھی راؤ انوارسمیت دیگر ضمانت پر ہیں۔

دوسری جانب ایڈیشنل ڈسٹرکٹ اینڈ سیشن جج غربی کراچی کی عدالت میں مبینہ پولیس مقابلے میں ارسلان محسود کے قتل کیس کی سماعت ہوئی۔

عدالت نے سابق ایس ایچ او اعظم گوپانگ کی درخواست ضمانت مسترد کردی۔

ارسلان محسود قتل کیس میں انٹیلی جنس اہلکار توحید اور اس کا دوست عمیر نامزد ہیں۔

ملزمان توحید اورعمیر نے فائرنگ کرکے دسمبر 2021 کو اورنگی ٹاؤن کے علاقے میں ارسلان محسود کو قتل کردیا تھا۔

پولیس اہلکاروں نے واقعے کو پولیس مقابلے کا جھوٹا رنگ دینے کی کوشش کی تھی۔

قادرمندوخیل ایڈووکیٹ وکیل مدعی مقدمہ کے مطابق کیس میں تین عینی شاہد موجود ہیں۔

وکیل مدعی مقدمہ کا مؤقف ہے کہ ملزم اعظم گوپانگ کے خلاف ٹھوس شواہد موجود ہیں ضمانت نہ دی جائے۔