پاکستان کے لیے متعین امریکی سفیرڈونلڈ بلوم نے اسلام آباد میں اپنے منصب کی ذمہ داریاں سنبھال لیں ہیں۔

امریکی سفارت خانے کی جانب سے جاری بیان کے مطابق نئے امریکی سفیرڈونلڈ بلوم پاکستان میں امریکی سفارتی مشن کی جانب سے پاکستانی اورامریکی عوام کے درمیان تعلقات کوفروغ دینےکے لیے کام کریں گے۔

بیان میں کہا گیا ہے کہ ڈونلڈ بلوم پاک امریکہ تعلقات کو بہتربنانے کے لیے جاری کوششوں کی قیادت اورپاکستان کے مستحکم، محفوظ اور خوشحال مستقبل کے لیے حکومتِ پاکستان کے ساتھ مل کر کام کریں گے، اورمشترکہ مقاصد کے حصول کے لیے وہ امریکی مشن پاکستان میں اپنے ساتھ بیش بہا تجربہ اورمہارت لے کرآئے ہیں۔

امریکی سفارت خانے میں اپنی آمد کے موقع پرنئے امریکی سفیرڈونلڈ بلوم کا کہنا تھا کہ وہ پاکستان پہنچ کرخوشی محسوس کر رہے ہیں۔ وہ اس خوبصورت ملک کوجاننے اوریہاں کے لوگوں اورثقافت سے واقفیت حاصل کرنے کے منتظرہیں۔

ڈونلڈ بلوم کا مزید کہنا تھا کہ امریکہ اورپاکستان کے درمیان تعلقات کے قیام کی 75 ویں سالگرہ کے موقع پروہ دونوں ممالک کے درمیان تعلقات کومزید مضبوط کرنے پرکام جاری رکھیں گے۔

سفارتی ذرائع کے مطابق ڈونلڈ بلوم 4 سال بعد امریکی سفیرتعینات ہورہے ہیں، ستمبر2018 میں امریکا نے ناظم الامور پال جونزکواس عہدے پر تعینات کیا تھا۔ تاہم، پال جونزکی مدت مکمل ہونے کے بعد انجیلا ایگلربطورناظم الامورتعینات ہوئیں۔