پاکستان تحریک انصاف  کے لانگ مارچ کی پیش نظر اسلام آباد  میں ریڈ زون کی سیکیورٹی کو  یقینی بنانے کے لئے فوج طلب کرلی گئی ہے۔

وزیر داخلہ رانا ثنا اللہ کا کہنا ہے کہ وفاقی حکومت نے اسلام آباد کے ریڈ زون کی سیکیورٹی کے لیے پاک فوج کو طلب کر لیا ہے۔

The Federal Government is pleased to authorize deployment of sufficient strength of troops of Pakistan Army in Red Zone under Article 245. pic.twitter.com/85Nex2xama

Advertisement

— Rana SanaUllah Khan (@PresPMLNPunjab) May 25, 2022

ایک ٹویٹ میں، وزارت داخلہ کا نوٹیفکیشن شیئر کرتے ہوئے انہوں نے کہا کہ فوج جن عمارتوں کی حفاظت کرے گی ان میں سپریم کورٹ، پارلیمنٹ ہاؤس، وزیراعظم ہاؤس، ایوان صدر، پاکستان سیکریٹریٹ اور ڈپلومیٹک انکلیو شامل ہیں۔

وزیر داخلہ رانا ثناء اللہ نے کہا کہ پی ٹی آئی کے سربراہ عمران خان نے سپریم کورٹ آف پاکستان کے فیصلے کی خلاف ورزی کر کے توہین عدالت کی ہے۔

انہوں نے کہا کہ سپریم کورٹ نے پی ٹی آئی کو اسلام آباد کے سیکٹر ایچ نائن میں جلسہ کرنے کی مشروط اجازت دی ہے لیکن عمران خان ڈی چوک پر جلسہ کر رہے ہیں۔

عمران نیازی کی PTI کارکنوں کو ڈی چوک پہنچنے کی کال سپریم کورٹ کے آج کے فیصلے کی توہین کی ہے۔ کورٹ نے PTI کو سیکٹر H9 اسلام آباد میں اجتماع کی مشروط اجازت دی ہے۔ اس کا ٹریک ریکارڈ ہے اسنے نہ کبھی کسی عدالت کا احترام کیا ہے اور نا کسی ادارے کا۔

— Rana SanaUllah Khan (@RanaSanaullahPK) May 25, 2022

وزیر داخلہ نے کہا کہ عمران خان کے ٹریک ریکارڈ کے مطابق انہوں نے کبھی کسی عدالت یا ادارے کا احترام نہیں کیا۔

رانا ثناء اللہ نے کہا کہ امن و امان کا قیام اور شہریوں کے جان و مال کا تحفظ ریاست کی اولین ذمہ داری ہے۔

انہوں نے کہا کہ ڈی چوک کو سیکیورٹی خدشات کے پیش نظر سیل کر دیا گیا ہے۔

خیال رہے کہ فوج آئین کے آرٹیکل 245 کے تحت تعینات کی گئی ہے جو کہ پارلیمنٹ، ایوان صدر اور وزیراعظم ہاؤس کی سیکیورٹی کے لئے تعینات ہے۔

گزشتہ روز اسلام آباد کی ضلعی انتظامیہ کی جانب سے عمران خان کے لانگ مارچ کے لئے این او سی کی درخواست مسترد کردی گئی تھی۔

درخواست مسترد کرتے ہوئے ضلعی انتظامیہ نے پی ٹی آئی کو تمام سیکیورٹی نکات سے بھی آگاہ کردیا تھا۔