سابق وزیراعظم اور پاکستان تحریک انصاف کے  چیئرمین کے لانگ مارچ ختم کرنے کے اعلان کے بعد کراچی میں جاری دھرنا ختم کردیا گیا ہے۔

تفصیلات کے مطابق اسلام آباد میں جناح ایونیو سے خطاب کرتے ہوئے عمران خان نے حکومت کو 6 دن کا  وقت دیا ہے اور ساتھ ہی لانگ مارچ ختم کرنے کا بھی اعلان کیا ہے۔

 عمران خاں نے حکومت کو 6 دن میں اسمبلیاں تحلیل کرنے اور نئے انتخابات کی تاریخ دینے کا کہا ہے بصورت دیگر انہوں نے ایک بار پھر اسلام آباد کی جانب لانگ مارچ کے حوالے سے تنبیہہ کردی ہے۔

پی ٹی آئی چیئرمین کے اس اعلان کے بعد کراچی کے علاقے نمائش چورنگی پر جاری کارکنان نے دھرنا ختم کردیا ہے اور پرامن انداز میں منتشر ہونا شروع ہوگئے ہیں۔

خیال رہے کہ گزشتہ روز پی ٹی آئی کے کارکنان کو روکنے کے لئے نمائش چورنگی تک جانے والے تمام راستوں کو بند کردیا گیا تھا جبکہ پولیس کی بھاری نفری بھی تعینات کی گئی تھی۔

انتظامیہ کے تمام تر سیکیورٹی اقدامات کے باوجود کارکنان نمائش چورنگی پہنچنے میں کامیاب ہوگئے تھے جنہیں منتشر کرنے کے لئے  آنسو گیس کی شیلنگ بھی کی گئی تھی۔

اس موقع پر خاتون پولیس اہلکار بھی طلب کی گئیں تھیں تاکہ خواتین کارکنان سے نمٹا جاسکے۔