کم عمربچے کی گرفتاری پرکراچی کی مقامی عدالت نے ڈی آئی جی ایسٹ کو انکوائری کا حکم دے دیا۔

تفصیلات کے مطابق جوڈیشل مجسٹریٹ شرقی کراچی شیخ عباس مہدی نے کم عمر بچے کو گرفتار کرنے پرڈی آئی جی ایسٹ کو ایس ایچ او اور ہیڈ کانسٹیبل غلام حسین کے خلاف انکوائری کا حکم دیتے ہوئے دونوں کو شوکاز نوٹس جاری کردیے۔

عدالت نے ریمارکس دیے کہ کیوں نا آپ دونوں کے خلاف قانون کے مطابق کارروائی کی جائے۔

عدالت نے دونوں ہیڈ کانسٹیبل گل کم خان اور ایس ایچ اوعزیز بھٹی کو 30 مئی کو طلب کرتے ہوئے ریمارکس میں کہا کہ شہریوں کی حفاظت محکمہ پولیس کی وجہ سے داؤ پر لگی ہوئی ہے۔ قانون کے مطابق پولیس کا کام شہریوں کی حفاظت کرنا ہے۔

جوڈیشل مجسٹریٹ شرقی نے کہا کہ پولیس افسران اپنے عہدے کا غلط استعمال کرتے ہیں۔ ڈی آئی جی ایسٹ ہیڈ کانسٹیبل غلام حسین اور ایس ایچ او عزیز بھٹی کے خلاف آزادنہ انکوئری کریں۔ دونوں پولیس آفیشل کے خلاف محکمہ جاتی کارروائی بھی کی جائے۔

عدالت نے کم عمرملزم رضوان کو رہا کرنے کا حکم دیتے ہوئے ڈی آئی جی ایسٹ کو ہدایت کی کہ 10 دن میں رپورٹ جمع کرائیں۔

پولیس نے کباڑکی دکان میں کام کرنے والے 15 سالہ رضوان کو گرفتار کیا تھا۔ ملزم پر چوری شدہ موٹر سائیکل کے پارٹ خریدنے کا الزام تھا۔