وزیراعظم عمران خان کی زیرصدارت میڈیااسٹریٹجی کمیٹی کااجلاس آج ہوگا۔

ذرائع کاکہناہے کہ وزیراعظم عمران خان کی زیر صدارت میڈیا اسٹریٹجی کمیٹی کے ‏اجلاس میں موجودہ سیاسی اورمعاشی صورتحال پربات چیت ہوگی۔

ذرائع نے بتایا کہ اجلاس کے دوران ‏نیب آرڈیننس پرحکومتی بیانیےسےبھی آگاہ کیاجائےگا جبکہ اس دوران قانونی ٹیم اورحکومتی رہنمابھی اجلاس میں شریک ہوں گے۔

ذرائع کےمطابق قانونی ٹیم سپریم کورٹ میں نظرثانی اپیل سے متعلق بریفنگ دے گی۔

وزیراعظم کاورلڈ اکنامک فورم کے اجلاس میں شرکت کا فیصلہ

ذرائع نے بتایاکہ حکومتی پالیسیوں کو میڈیا میں اجاگر کرنے کی حکمت عملی پرغورکیاجائےگاجبکہ نیب ترمیمی آرڈیننس پراپوزیشن کو جواب دینے کیلئے حکمت بھی تیارکی جائے گی۔

گزشتہ روزوزیر اعظم کے معاون خصوصی برائے احتساب شہزاد اکبر کانیب آرڈیننس سے متعلق پریس کانفرنس میں  کہنا ہے کہ ماضی میں نیب قوانین میں ترامیم کی کوششوں کا مقصد خود کو بچانا تھا اور اگر اس مرتبہ کی گئی ترامیم سے کوئی ذاتی فائدہ اٹھانا چاہتا ہے تو اس حکومت میں یہ نہیں ہوسکتا۔

اسلام آباد میں پریس کانفرنس کرتے ہوئے وزیراعظم کے معاون خصوصی شہزاد اکبر کا کہنا تھا کہ گزشتہ چند روز سے یہ تاثر دیا گیا کہ احتساب کا عمل ختم ہوگیا، نیب ترمیمی آرڈیننس کے حوالے سے کچھ وضاحتیں بہت ضروری ہیں، ماضی میں آرڈیننس میں ترمیم خواہشات پر مبنی تھی جو ابہام کی وجہ تھی۔

انھوں نے مزید کہا کہ ‘آرڈیننس کو پارلیمان کے پاس ہی جانا ہے اگر اپوزیشن کی کسی جماعت کے پاس کوئی بہتر تجویز ہے تو سامنے لائے۔’

انھوں نے کہا کہ ‘گزشتہ 10 برس میں نیب قوانین میں تبدیلی کی خواہشات بدنیتی پر مبنی تھیں شاید اسی وجہ سے ان پر عمل نہ ہو سکا۔’

شہزاد اکبر نے قومی احتساب بیورو (نیب) کے قوانین میں ترمیم کی وضاحت دیتے ہوئے کہا کہ مذکوہ ترمیم کی بدولت ٹیکس کے تمام معاملات نیب نہیں بلکہ وفاقی تحقیقاتی ادارہ (ایف آئی اے) دیکھے گا۔