نئے چیئرمین نیب کی تعنیاتی کے معاملے پر حکمران اتحاد میں اختلافات سامنے آگئے ہیں۔

تفصیلات کے مطابق حکومت کی اتحادی جماعتوں کی جانب سے چیئرمین نیب کے لیے سپریم کورٹ کے سابق جج جسٹس (ر) مقبول باقر کے نام پر اتفاق کرلیا گیا تھا تاہم مسلم لیگ ن نے جسٹس ر مقبول باقر کے نام پر تحفظات ظاہر کردیئے ہیں۔

اس حوالے سے ن لیگ کا کہنا ہے کہ ریٹائرڈ ججز کو چیئرمین نیب لگانے کے اثرات ہم بھگت چکے ہیں تاہم حکومتی پارٹی نے درخواست کی ہے کہ کسی اچھی شہرت کے حامل بیورو کریٹ کا نام تجویز کردیں۔

اس حوالے سے ذرائع کا کہنا ہے کہ سابق صدر آصف علی زرداری مقبول باقر کے نام پر ہی بضد ہیں جس کے متعلق ان کا کہنا ہے کہ جسٹس (ر) مقبول باقر کی اچھی شہرت اور غیر متنازعہ ہیں۔

دوسری جانب ن لیگ کے تحفظات کی پیش نظر وزیراعظم شہباز شریف نے وزیر قانون اعظم نذیر تارڑ کو مزید نام بھیجنے کی ہدایت کرتے ہوئے اپوزیشن لیڈر راجہ ریاض کو سابق سرکاری افسران کے نام دینے کی درخواست کی ہے۔

خیال رہے کہ سابق صدر آصف زرداری اور شہباز شریف کی جانب سے چیئرمیں نیب کے لیے مقبول باقر کے نام پر اتفاق کے بعد وہ اس  عہدے کے لیے مضبوط امیدوار ہیں اور اگر اپوزیشن لیڈر راجا ریاض نے جسٹس (ر) مقبول باقر کے نام پر کوئی اعتراض نہیں کیا تو انہیں ہی اگلا چیئرمین نیب لگایا جائے گا۔

ذرائع کا کہنا ہے کہ وزیراعظم اور اپوزیشن لیڈر کے درمیان اتفاق کے بعد چیئرمین نیب کے نام کی سمری صدر کو ارسال کردی جائے گی۔