پاکستانی گلوکارہ شائی گل نے تنقید کرنے والوں کو کرارا جواب دے دیا۔

گلوکار سدھو موسے والا کی ناگہانی موت پر شائی گل نے انتہائی افسوس کا اظہار کرتے ہوئے ان کی روح کو سکون نصیب ہونے اور لواحقین کے لیے صبر کی دعا کی جس پر انہیں تنقید کا نشانہ بنایا گیا۔

سوشل میڈیا صارفین نے تنقید کرتے ہوئے کہا کہ ایک مسلمان ہو کر اسے غیرمسلم کے لیے ایسی دعا نہیں کرنی چاہئیے تھی۔

تنقید کے جواب میں انہوں نے ایک اور انسٹاگرام پوسٹ میں کہا کہ مجھے بہت سے ایسے پیغامات موصول ہو رہے ہیں اور میں ان سب لوگوں کو بتانا چاہتی ہوں کہ میں مسلمان نہیں ہوں، میں کرسچین ہوں اور ایک عیسائی فیملی سے تعلق رکھتی ہوں، چنانچہ میں دیگر مذاہب سے تعلق رکھنے والوں کے لیے دعا کر سکتی ہوں۔

بعد ازاں شائی گل نے کچھ لوگوں کی طرف سے موصول ہونے والے ڈائریکٹ میسجز کے سکرین شاٹس شیئر گئے جس میں لوگ شائی گل کو بتا رہے تھے کہ لوگوں کی آپ پر تنقید غلط ہے، مسلمان بھی مذہب سے بالاتر ہو کر کسی بھی دوسرے مذہب کے شخص کے لیے ایسی دعا کر سکتے ہیں، جو لوگ تنقید کر رہے ہیں درحقیقت وہ خود غلط راستے پر ہیں۔

واضح رہے کہ شائی گل نے کوک سٹوڈیو سیزن 14 میں علی سیٹھی کے ساتھ گائے گئے گیت پسوڑی سے گائیگی کی دنیا میں قدم رکھا اور ان کا یہ پہلا گیت ہی سپرہٹ گیا۔

 گلوکارہ کا یہ گانا سپاٹی فائی کے گلوبل وائرل 50 گانوں میں تیسرے نمبر پر رہا، یہ پاکستان کی تاریخ کا پہلا گیت ہے جسے اتنی کم مدت میں 10 کروڑ لوگوں نے دیکھا۔