آنجہانی بھارتی گلوکار کرشنا کمار کناتھ کے ساتھ پرفارم کرنے والی گلوکارہ کا بیان سامنے آگیا ہے۔

بھارتی میڈیا کی رپورٹ کے مطابق گلوکار کے ساتھ آخری کانسرٹ میں پرفارم کرنے والی گلوکارہ نے ایک خصوصی بات چیت میں انکشاف کیا ہے کہ کے کے ہجوم کو دیکھ کر اپنی کار سے باہر آنے کو تیار نہیں تھے۔

اُنہوں نے کہا کہ گرین روم میں باہر سے کسی کو بھی جانے کی اجازت نہیں تھی، صرف مجھے اجازت تھی۔

گلوکارہ نے کہا کہ کے کے نے مجھ سے دو منٹ تک بات کی، تب وہ بالکل ٹھیک تھے اور میں نے اُن کے ساتھ سیلفی بھی لی۔

انہوں نے بتایا کہ کے کے نے اسٹیج کے منتظمین سے بھی درخواست کی تھی کہ وہ اپنی پرفارمنس کے درمیان اسٹیج کی لائٹس کو مدھم کردیں۔

بھارتی میڈیا کے مطابق گلوکار 31 مئی کو کولکتہ میں ایک شو سے واپسی کے بعد نیو مارکیٹ تھانے کے علاقے کے تحت واقع گرینڈ ہوٹل میں گر گئے تھے اور اُنہیں شہر کے ایک نجی اسپتال لے جایا گیا تھا، جہاں انہیں مردہ قرار دیا گیا۔

واضح رہے کہ کے کے کی پہلی البم ’پل‘ 1999 میں ریلیز ہوئی تھی، تاہم اس کے بعد انہوں نے بالی ووڈ میں گانوں پر توجہ دی۔

انہوں نے بلاک بسٹر فلم ’ہم دل دے چکے صنم‘ کا مشہورِ زمانہ گیت ’تڑپ تڑپ کے‘، فلم ’دس‘ کا گیت ’دس بہانے‘، فلم ’غنڈے‘ کا گانا ’تو نے ماری انٹریاں‘ اور فلم ’وہ لمحے‘ کا مشہور گیت ’کیا مجھے پیار ہے‘ بھی گایا ہے، جبکہ فلموں میں ان کے گانوں کی ایک طویل فہرست موجود ہے۔