نئے سال کے موقع پر ملائیشیا میں  قید 300 پاکستانی شہری  رہائی ملنے کے بعد وطن واپس پہنچ گئے ہیں۔

تفصیلات کے مطابق وفاقی وزیر برائے ہوابازی غلام سرور خان نے کہا  ہےکہ وطن لوٹنے والے پاکستانی شہری مختلف وجوہات کی بنا پر ملائیشیا میں قید تھے۔

انہوں نے کہا کہ اس سلسلے میں پاکستان انٹرنیشنل ایئر لائن (پی آئی اے )نے بڑا فیصلہ کیا  اورکوالالمپور سے اسلام آباد کے لئے  ایک خصوصی پرواز چلائی جس میں بو ئنگ 777 طیا رہ استعما ل کیا گیا۔

غلام سرور خان کا مزید کہنا تھا کہ اتنی بڑی تعداد میں لوگوں کو اتنی جلدی لانے  کے لیےکوئی بھی ایئر لائن تیار نہ تھی تو ایسے میں اس کام کا بیڑہ پی آئی اے نے اٹھایا۔

حکومت پاکستان کی ہدایت پر  آج ملائیشیا سے پاکستانی غیر قانونی تارکین وطن  کو لانے کے لئے پی آئی اے کی خصوصی پرواز کا اہتمام کیا گیا ۔

واضح رہے کہ ملائیشیا کی حکومت نے اصل ممالک میں رضاکارانہ وطن واپسی کی سہولت کے لئے بیک 4 گڈ (بی 4 جی) ایمنسٹی اسکیم متعارف کروائی ہے۔

پاکستانی ہندؤں نے نریندر مودی کی جانب سےبھارتی شہریت کی آفر مسترد کردی

یاد رہے کہ رواں سال مئی میں بھی پی آئی اے کی خصوصی پرواز عید الفطر سے پہلے 320 پاکستانیوں کو کوالالمپور سے لے کر اسلام آباد آئی تھی۔

وزارت خارجہ کے مطابق یہ پاکستانی ملائیشیا کی جیلوں میں اپنی سزا پوری کر چکے تھے اور اس میں سے بیشتر اپنا واپسی کا ٹکٹ خریدنے کی سکت بھی نہیں رکھتے تھے۔

دوسری جانب اسلام آباد ایئرپورٹ پر کوالالمپور سے آنے والے پاکستانیوں کی امیگریشن کا عمل مکمل ہوگیا۔ایف آئی اے نے تمام مسافروں کو کلیئر کردیا ہے۔مسافر کچھ دیر میں ایئرپورٹ سے باہر آئیں گے۔

پی آئی اے کا طیارہ 6بجکر 5منٹ پر اسلام آباد ایئرپورٹ پہنچا تھا۔ملائیشیا سے آنے والے مسافروں کے لیے ایف آئی اے امیگریشن نے خصوصی کاؤنٹر قائم کیا تھا۔

وزارت اورسیز پاکستانیز کے حکام نے ملائیشیا کی جیلوں سے آنے والے قیدیوں کا استقبال کیا۔مسافروں کی جانب سے وزیر اعظم پاکستان کا شکریہ ادا کیا گیا۔