عدالت نے پانچ مخصوص نشستوں پراراکین اسمبلی کا نوٹیفکیشن جاری نہ کرنے پرالیکشن کمیشن کونوٹس جاری کردیا۔ 

تفصیلات کے مطابق لاہورہائی کورٹ میں الیکشن کمیشن کی جانب سے پانچ مخصوص نشستوں پر اراکین اسمبلی کا نوٹیفکیشن جاری نہ کرنے کے خلاف درخواستوں پر سماعت ہوئی۔

عدالت نے درخواستوں پر الیکشن کمیشن آف پاکستان  کو نوٹس جاری کرتے ہوئے دس روز میں جواب طلب کرلیا جبکہ  سرکاری وکیل نے جواب داخل کرنے کے لیے عدالت سے مہلت  طلب کی۔

جسٹس شجاعت علی خان نے پی ٹی آئی  کے سمیوئیل یعقوب سمیت دیگر کی درخواستوں پر سماعت کی جس میں  درخواست گزارکی طرف سے عامرسعید راں اور اظہر صدیق ایڈووکیٹس عدالت میں پیش ہوئے۔

وکلا درخواست گزاران نے عدالت کے سامنے مؤقف پیش کیا کہ الیکشن کمیشن  نے منحرف ہونے والے پارٹی ممبران صوبائی اسمبلی کو ڈی سیٹ کردیا۔ ان میں مخصوص نشستوں پر کامیاب ہونے والی مخصوص نشستوں پر منتخب ہونے والی ممبران صوبائی اسمبلی  بھی شامل تھیں۔

درخواست گزاروں کے وکلا نے یہ مؤقف بھی اپنایا کہ الیکشن کمیشن ڈی سیٹ ہونے والے اراکین کی جگہ نئے اراکین کا نوٹیفکیشن جاری نہیں کررہا۔ الیکشن کمیشن قانون اور رولز کی خلاف وزری کررہا ہے۔

درخواست گزاروں نے یہ مؤقف بھی اپنایا کہ الیکشن کمیشن کو نوٹیفکیشن جاری کرنے کے لیے خط بھی لکھا گیا۔ عدالت میں یقین دہانی کے باوجود الیکشن کمیشن  فیصلہ نہیں کررہا۔ عدالت سے استدعا ہے کہ عدالت فوری الیکشن کمیشن کو محضوض نشستوں کا نوٹیفکیشن جاری کرنے کا حکم دے۔