گینگسٹر لارنس بشنوئی نے بالی ووڈ اسٹار سلمان خان کو ملنے والے دھمکی آمیز خط سے لاعلمی کا اظہار کیا ہے۔

بھارتی میڈیا رپورٹس کے مطابق دہلی پولیس نے گینگسٹر لارنس بشنوئی سے اس خط کے حوالے سے پوچھ گچھ کی جو اداکار سلمان خان کو ملا ہے کیونکہ اُنہوں نے سلمان خان کو قتل کرنے کی سازش کا اعتراف کیا تھا۔

 لارنس کا کہنا ہے کہ انہیں اس بات کا کوئی علم نہیں ہے کہ سلمان خان کے لیے خط کس نے لکھا۔

بشنوئی سے جب خط میں بتائے گئے گولڈی برار کے نام کے بارے میں پوچھا گیا تو اس نے کہا کہ برار کی اداکار سے کوئی دشمنی نہیں اور انہیں دھمکی دینے کی کوئی وجہ بھی نہیں تھی۔

یاد رہے کہ لارنس بشنوئی جن کے گینگ نے 29 مئی کو گلوکار و سیاستدان سدھو موسے والا کا قتل کیا تھا، سال 2018 میں اداکار سلمان خان کو قتل کرنے کی دھمکی دی تھی۔

بھارتی میڈیا نے رپورٹ کیا ہے کہ یہ خط سلمان خان کے والد سلیم خان کے گارڈز کو ممبئی کے باندرا بینڈ اسٹینڈ پرومونڈے کی ساحلی پٹی کے قریب ملا جہاں یہ دونوں باپ بیٹے صبح کی واک کے بعد کچھ دیر بیٹھتے تھے تاہم ممبئی پولیس نے اس خط کی وصولی کے حوالے سے نامعلوم افراد کے خلاف مقدمہ درج کرلیا ہے۔

یہ پہلا موقع نہیں جب سلمان خان کو دھمکیاں موصول ہوئی ہوں، اس سے قبل بھی اداکار کو دھمکی آمیز کالز اور خط موصول ہوچکے ہیں۔