پاکستان کے سابق کپتان اور لیجنڈری فاسٹ بلر وسیم اکرم نے مداحوں سے کہا ہے کہ وہ حسن علی کا ساتھ دیں جو مشکل  وقت سے گزر رہے ہیں۔

تفصیلات کے مطابق وسیم اکرم نے ایک ویڈیو پیغام میں کہا کہ  میری مداحوں سے گزارش ہے کہ حسن علی پر تنقید کرنا بند کریں اگر ہم اسے اعتماد نہیں دیں گے تو کون  دے گا۔

سابق کپتان نے کہا کہ وہ بمشکل اپنا دوسرا اوور پھینکتا ہے اور ٹویٹر پر ٹرینڈ کرنے لگتا ہے کہ ‘وہ کیوں کھیل رہا ہے؟’، براہ کرم اسے کچھ جگہ دیں، اس نے حال ہی میں لنکاشائر کے لیے اچھی کارکردگی کا مظاہرہ کیا ہے اور لوگ ان کی خدمات سے خوش ہیں۔

ویسٹ انڈیز کے خلاف پہلے ون ڈے میں حسن علی نے بغیر کوئی وکٹ لیے اپنے 10 اوورز میں 68 رنز دیے۔

 فاسٹ بولر کو ٹی ٹوئنٹی ورلڈ کپ 2021 کے بعد سے اپنی کارکردگی پر شائقین کی جانب سے تنقید کا سامنا ہے ایسے میں وسیم اکرم  نے حسن علی  کو میچ ونر قرار دیتے ہوئے انہیں مثبت رہنے کی تاکید کی۔

سابق فاسٹ بولر نے حسن علی سے مخاطب ہوتے ہوئے کہا کہ حسن تم ان لوگوں کی فکر نہ کرو ہم سب آپ کے پیچھے ہیں ایک سابق کرکٹر اور سابق کپتان کے طور پر اور مجھے لگتا ہے کہ پورا ملک آپ کے پیچھے ہے لہذا، میری مکمل حمایت آپ کے ساتھ ہے ۔