قمر زمان کائرہ نے یاسین ملک کیس عالمی عدالت میں لے جانے کا عندیہ دے دیا۔

مشیر امور کشمیر و گلگت بلتستان قمر زمان کائرہ کی بیٹ رپورٹرز سے ملاقات ہوئی جس میں انہوں نے کہا کہ یاسین ملک کا کیس عالمی عدالت لیجانے کیلئے قانونی مشاورت جاری ہے، یاسین ملک کی فیملی کی ہر ممکن قانونی مدد کریں گے۔

انہوں نے کہا کہ بلاول بھٹو نے ہر فورم پر مسئلہ کشمیر کو اجاگر کیا، مسئلہ کشمیر پر پوری وزارت امور کشمیر وسیع مشاورت کا آغاز کر رہے ہیں۔

قمر زمان کائرہ کا کہنا تھا کہ آزاد کشمیر اور گلگت بلتستان میں عدم اعتماد کا فیصلہ وہاں کی مقامی قیادت کرے گی۔

مشیر امور کشمیر و گلگت بلتستان نے کہا کہ ملکی معیشت کی وجہ سے آزاد کشمیر اور گلگت بلتستان سمیت چاروں صوبوں کے بجٹ میں کٹ لگا ہے۔

انہوں نے یہ بھی کہا کہ گلگت بلتستان اور آزاد کشمیر کے بجٹ میں کچھ حد تک نرمی کی گئی ہے، مسئلہ کشمیر پر مسلم ممالک کا کردار بھی کچھ خاطرخواہ نہیں رہا ہے۔

قمر زمان کائرہ کا کہنا تھا کہ جب تک پاکستان معاشی طور پر مضبوط نہیں ہوگا کشمیریوں کی مدد نہیں کرسکتا، گلگت بلتستان میں بہت جلد گورنر کی تعیناتی عمل میں لائی جائے گی۔

مشیر امور کشمیر و گلگت بلتستان قمر زمان کائرہ کا مزید کہنا تھا کہ آزاد کشمیر اور گلگت بلتستان کے انتخابات وفاق کے ساتھ ہونے چاہیے،آزاد کشمیر اور گلگت بلتستان میں موجود حکومتوں کو ہر طرح کی سپورٹ فراہم کریں گے۔