وفاقی وزیر دفاع خواجہ آصف نے کہا ہے کہ میں عوام سے گزارش کرتا ہوں کہ کفایت شعاری اپنائیں اس سے معاشی صورتحال میں بہتری آئیگی۔

پریس کانفرنس سے خطاب کرتے ہوئے وزیر دفاع کا کہنا تھا کہ موجودہ حالات کی پیش نظر کفایت شعاری ہمارے کلچر کا حصہ بن جانا چاہیے۔

انہوں نے کہا کہ مہنگائی قابو سے باہر ہو رہی ہے اسے کفایت شعاری سے روک سکتے ہیں لیکن قومی سطح پر نا حکومتوں نے نا کسی اور نے اس طرف سوچا جبکہ ایسی صورتحال میں اجتماعی کوشش کرنا پڑتی ہے۔

خواجہ آصف نے کہا کہ حکومت معاشی تحفظ فراہم کرنے کے لئے پوری کوشش کرے گی اور اسکی ذمہ داری ہم ہی اٹھائینگے۔

انہوں نے کہا کہ اس مشکل صورتحال سے نمٹنے کے لئے اتحادی سب ملکر مشکلات سے نکلنے کی کوشش کر رہے ہیں۔

انہوں نے مزید کہا کہ کووڈ میں تاجروں نے بیماری کے ڈر سے اوقات تبدیل کئے تھے لیکن آج 3500 میگا واٹ بجلی روزانہ کی ضرورت ہے جس کے لئے سب اپنے اوقات جو مہذب دنیا میں ہیں وہ بہتر کر لیں تو بہتری آئیگی۔

ان کا کہنا تھا کہ پچھلی حکومتیں قیمتیں جس سطح پر چھوڑ کر گئی وہ سب محسوس کرتے ہیں لیکن ہم نے دو ماہ کوشش کی کہ اچھائی کریں۔

خواجہ آصف نے کہا جب تحریک عدم اعتماد کے بعد کامیابی ملی تو دو چوائس تھیں ، یا تو جلد الیکشن کرواتے یا پھرمشکل فیصلے کرتے۔

ان کا کہنا تھا کہ آج عمران خان صاحب جس قسم کے بیانات دیتے ہیں وہ سب آپ کے سامنے ہے وہ اپنے دورہ حکومت کی خود کچھ بات نہیں کرتے۔