سبطین خان نے کہا ہے کہ پاکستان کا سب سے زیادہ آبادی والا صوبہ بدترین دستوری بحران کی لپیٹ میں ہے۔

 سابق صوبائی وزیر سبطین خان نے حمزہ شہباز کی پریس کانفرنس پر ردعمل دیتے ہوئے کہا ہے کہ شرمناک جعلی انتخاب کے ذریعے اقتدار ہتھیانے والا مجرم پنجاب میں آئین کی دھجیاں اڑا رہا ہے۔

انہوں نے کہا ہے کہ مجرم وزیراعلیٰ اور اسکے حواریوں نے پنجاب میں پارلیمانی بالادستی کو دفن کردیا ہے، پاکستان کا سب سے زیادہ آبادی والا صوبہ بدترین دستوری بحران کی لپیٹ میں ہے۔

سبطین خان نے کہا ہے کہ جعلی اور غیر آئینی طریقے سے بجٹ منظور کرکے ڈاکہ زنی کی نئی واردات کی تیاری کی گئی، منی لانڈرنگ کا مجرم اپنے اور اپنے والد کے مقدمات سے چھٹکارے کیلئے سارے جتن کررہا ہے۔

سابق صوبائی وزیر نے کہا ہے کہ اس مجرم نے سب سے پہلے اسمبلی پر پولیس گردی کروائی اور ایوان کا تقدس مجروح کیا، اراکین اسمبلی کے گریبان چاک کرنے کے بعد اس مجرم نے عوام کے آئینی و جمہوری حقوق دبانے کیلئے پولیس کا بے دریغ استعمال کیا۔

انہوں نے کہا کہ چیف سیکرٹری، آئی جی پنجاب اور سی سی پی او لاہور اس غنڈہ راج کے کل پرزے ہیں، پنجاب کے مافیاز کا سرپرست چادر اور چار دیواری کا تقدس پامال کرتے ہوئے مجرم راج کے دوام کیلئے ہاتھ پاؤں مار رہا ہے۔

سبطین خان نے کہا ہے کہ عوام پوری ثابت قدمی کے ساتھ کھڑے ہیں، جلد بھرپور لائحہ عمل دیں گے، مجرم کو پکڑیں گے اور قوم کے چوری شدہ مال نکلوانے کے ساتھ ان جرائم کا بھی حساب لیں گے۔