پاکستان نے مشرق وسطیٰ کے بگڑت حالات  پر گہری تشویش کا اظہار کیا ہے۔

تفصیلات کے مطابق دفتر خارجہ کی  جانب سے جاری  بیان میں کہا گیا ہے کہ پاکستان کو مشرق وسطیٰ کی بگڑتی صورتحال پر تشویش ہے، یہ صورتحال خطے کے امن و سلامتی کے لیے بڑا خطرہ ہے۔

دفتر خارجہ نے کہا کہ ایک دوسرے کی خودمختاری کا احترام اور علاقائی سالمیت اقوام متحدہ کے چارٹر کے بنیادی اصول ہیں جن پر عمل کیا جانا چاہئے۔

دفتر خارجہ کا مزید کہنا تھا کہ کسی بھی قسم کی یکطرفہ یا فوجی کارروائی  سے گریز کیا جائے۔

پاکستانی دفتر خارجہ نےاقوام متحدہ کے چارٹر اور بین الاقوامی قوانین کے مطابق  تمام فریقوں سے اپیل کی ہے کہ وہ تحمل کا مظاہرہ کریں، اور صورتحال کو قابو میں کرنے ے لیے مشترکہ کوشش اورسفارتی  طریقے سے حل کریں۔

واضح رہے کہ گذشتہ رات امریکا نے عراقی دارالحکومت بغداد کے ائیرپورٹ پر راکٹ حملہ کر کے ایران کی القدس فورس کے کمانڈر جنرل سلیمانی کو قتل کر دیا تھا۔

قاسم سلیمانی کی موت،دنیاتیسری جنگِ عظیم کےدہانےپر

جس پر ایران کے سپریم لیڈر آیت اللہ خامنہ ای نے کہا ہے کہ امریکا کو جنرل قاسم سلیمانی پر حملے کے سنگین نتائج بھگتنے ہوں گے۔

انہوں  نے تین دن کے سوگ کا اعلان کرتے ہوئے کہا کہ جنرل قاسم سلیمانی کے قتل کا بدلہ لیا جائے گا۔

ایرانی صدر حسن روحانی  نے بھی جنرل قاسم  سلیمانی پر حملے   پہ رد عمل  دیتے ہوئے کہا کہ ایرانی قوم  اس گھناؤنے جرم کا امریکا سے شدید انتقام لے گی۔

قبل ازیں ایرانی وزیر خارجہ جواد ظریف نے امریکی حملے پر سوشل میڈیا پر ردعمل میں کہا کہ جنرل سلیمانی پر حملہ کر کے امریکا نے عالمی دہشتگردی کی۔

خیال رہے کہ گزشتہ چند روز سے ایران اور امریکا کے درمیان کشیدگی میں اضافہ ہو گیا ہے۔چند روز قبل امریکا نے عراق میں فضائی حملہ کر کے مقامی ملیشیا کتائب حزب اللہ کے 25جنگجوؤں کو ہلاک کر دیا تھا۔

اس حملے کے ردعمل میں سیکڑوں کی تعداد میں مظاہرین نے بغداد میں امریکی سفارت خانے پر دھاوا بول کر توڑ پھوڑ کی تھی اور سفارت خانے کے بیرونی حصے کو آگ لگا دی تھی۔