سوڈان میں فوجی افسران کی جانب  سے  بغاوت کی منصوبہ بندی کو ناکام بنادیا  گیا ہے۔

 غیر ملکی خبر رساں  ادارے کے  مطابق  سوڈان میں  فوج کے 16 اہل کاروں نے سیاسی سمجھوتے میں رکاوٹ ڈالنے کے لیے بغاوت کی منصوبہ بندی کی  تھی۔

عبوری عسکری کونسل کے رکن جمال عمر نے گزشتہ روز سرکاری ٹیلی وژن پہ خطاب کرتے ہوئےکہا کہ بغاوت کی منصوبہ بندی کرنے والے فوج کے 12 اور انٹیلی جنس  کے 4  اہل کاروں کو گرفتار کر لیا گیا ہے۔

جنرل  عمر  کا کہنا تھا کہ  بغاوت کی منصوبہ بندی کرنے والوں میں   فوج   کے ریٹائرڈ سمیت حاٖضر سروس افسران بھی شامل ہیں  لیکن ان کانام  ظاہر نہیں  کیا گیا ۔

انہوں نے مزید کہا کہ گرفتار افراد کو منصفانہ قانونی کارروائی کے لیے عدالت میں پیش کیا جائے گا۔

 واضح  رہے کہ سوڈان کے سابق صدر  عمرالبشیر  کی معزولی کے بعد   فوج کی جانب سے  تیسری  بار بغاوت کی کوشش  کی گئی  ہے ۔

سوڈان میں عسکری کونسل اور فریڈم اینڈ چینج فورسز طویل مذاکرات کے بعد گذشتہ جمعے کے روز ایک خود مختار کونسل تشکیل دینے پر متفق ہو گئی ہیں۔ تین برس کی عبوری مدت کے لیے کونسل کی سربراہی باری باری فوج اور سویلین نمائندے کریں گے۔

فریقین نے آزاد ٹیکنوکریٹس کی حکومت تشکیل دینے پر بھی اتفاق کیا جو حالیہ دنوں میں رونما ہونے والے پرتشدد واقعات کی شفاف اور آزادانہ تحقیقات کرے گی۔