پنجاب کابینہ نے گندم ریلیز پالیسی میں دو ماہ توسیع کی منظوری دے دی۔

وزیر اعلیٰ پنجاب حمزہ شہباز شریف کی زیر صدارت صوبائی کابینہ کے چوتھے اجلاس کا انعقاد ہوا جس میں عوام کی سہولت کیلئے 11 ٹول پلازہ کو ختم کرنے کا فیصلہ ہوا، پنجاب کابینہ نے 11 ٹول پلازوں کو ختم کرنے کی منظوری دے دی۔

اجلاس میں وزیر اعلیٰ نے قیدیوں کی سہولت کے لئے پرزن وینز کو ہوا دار بنانے کی ہدایت کی۔

اجلاس میں کابینہ کمیٹی برائے گندم تشکیل دینے کی منظوری دی گئی۔

کابینہ کے اجلاس میں پراونشنل اسمبلی آف دی پنجاب استحقاق بل 2022 کی منظوری کے ساتھ پراونشنل اسمبلی آف دی پنجاب سیکرٹریٹ سروس بل 2022 کی منظوری بھی دی گئی۔

اجلاس میں پنجاب فرانزک سائنس ایجنسی کے ڈائریکٹر جنرل ڈاکٹر محمد اشرف طاہر کے کنٹریکٹ میں کارکردگی کی بنا پر توسیع کی منظوری، پولیس کے لئے آپریشنل گاڑیاں خریدنے کے فیصلے کی توثیق اور پنجاب کابینہ کے دوسرے اجلاس کے فیصلوں کی توثیق کی گئی۔

اس موقعے پر پنجاب کابینہ نے پنجاب اسمبلی سے صوبہ پنجاب کے نئے مالی سال 2022-23 کے بجٹ کی منظوری پر سیاسی و انتظامی ٹیم کو مبارکباد پیش کی۔

اجلاس میں صوبائی وزراء، چیف سیکرٹری اور اعلیٰ حکام نے شرکت کی۔