خالد خورشید نے کہا ہے کہ شندور پولو فیسٹیول انتہائی اہمیت کا حامل ہے۔

تفصیلات کے مطابق وزیر اعلیٰ گلگت بلتستان خالد خورشید کی زیر صدارت گلگت بلتستان میں پولو کے فروغ کے حوالے سٹیئرنگ کمیٹی کا اجلاس منعقد ہوا۔

اجلاس کی صدارت کرتے ہوئے وزیر اعلیٰ گلگت بلتستان خالد خورشید نے شندور پولو فیسٹیول میں گلگت بلتستان کی ٹیموں کی جیت کیلئے نیک خواہشات کا اظہار کرتے ہوئے جیتنے کی صورت میں 25 لاکھ نقد رقم انعام دینے کا اعلان کیا۔

خالد خورشید نے محکمہ سیاحت و کھیل کو گلگت بلتستان میں پولو کھیل کے فروغ اور ترقی کیلئے تمام پولو گراؤنڈز کی تزین و آرائش، مرمت اور سہولیات کی فراہمی کے ہدایات پر فوری عملدرآمد یقینی بنانے کا حکم دیا۔

وزیر اعلیٰ گلگت بلتستان نے مختلف کیٹیگریز کے پولو کھلاڑیوں کیلئے سینٹرل کنٹریکٹ کا نظام متعارف کرانے سمیت نوجوانوں کو پولو کھیل کی باضابطہ تربیت حاصل کرنے کے مواقع فراہم کرنے کیلئے اقدامات کرنے کے احکامات دیئے۔

خالد خورشید نے محکمہ سیاحت و کھیل کو گلگت بلتستان سپورٹس اتھارٹی کے قیام کیلئے شفارشات مرتب کرکے پیش کرنے کے احکامات بھی دیئے۔

اس موقع پر وزیر اعلیٰ گلگت بلتستان خالد خورشید نے گفتگو کرتے ہوئے کہا کہ پولو کھیل گلگت بلتستان کا ایک قومی اثاثہ ہے، اس کھیل کی ترقی کیلئے حکومت ہر ممکن اقدامات اٹھائے گی۔

خالد خورشید نے کہا کہ گلگت بلتستان کیلئے شندور پولو فیسٹیول انتہائی اہمیت کا حامل ہے، یہ ایونٹ عالمی سطح پر مقبول ہوا ہے۔

انہوں نے یہ بھی کہا کہ محکمہ سیاحت و دیگر تمام متعلقہ ادارے اس سال شندور پولو فیسٹیول کے شاندار انداز میں انعقاد کیلئے بہترین انتظامات یقینی بنائیں اور اس حوالے سے کوئی کوتاہی قابل برداشت نہیں ہوگی۔

وزیر اعلیٰ گلگت بلتستان خالد خورشید کا مزید کہنا تھا کہ شندور پولو فیسٹیول کے لئے حکومت تمام ضروری مالی وسائل فراہم کریگی۔