وزیر مملکت برائے خارجہ حنا ربانی کھر نے کہا ہے کہ ایک فرد کے حقوق کو دوسرے کے حقوق پر فوقیت نہیں دی جا سکتی۔

تفصیلات کے مطابق حنا ربانی کھر نے دولت مشترکہ سربراہان حکومت کے اجلاس میں پاکستان کی نمائندگی کی جس میں مشترکہ مستقبل کی فراہمی، پائیدار اور جامع ترقی، کوویڈ کے بعد بحالی، جمہوریت، امن اور گورننس سمیت مشترکہ تشویش کے امور زیر بحث آئے۔

وزیر مملکت برائے خارجہ نے اجلاس سے  خطاب کرتے ہوئے کہا کہ جمہوری ممالک کے خاندان کے طور پر، دولت مشترکہ اقوام متحدہ  میں اپنے مرکزی کردار کا اعادہ کرے۔

ان کا کہنا تھا کہ دولت مشترکہ کو جمہوریت، قانون کی  بالادستی، اچھی حکمرانی اور انسانی حقوق کے احترام قوموں کے اندر اور ان کے درمیان امن اور خوشحالی کو استحکام کی بنیادوں کے طور پر تسلیم کرنا چاہیے۔

انہوں نے اس بات پر زور دیا کہ یہ اقدار، خاص طور پر انسانی حقوق کا احترام، بشمول حق خود ارادیت کا اطلاق عالمی سطح پر  بلا امتیاز کیا جائے۔

حنا ربانی نے کہا کہ سب کو موروثی اور مساوی حقوق حاصل ہونے چاہئیں یعنی ذات، رنگ، جنس، عقیدے یا عقیدے کی بنیاد پر کوئی امتیاز نہیں کیا جانا چاہیے۔

اس موقعے پر وزیر مملکت نے رطانیہ کے وزیر برائے جنوبی ایشیا، دولت مشترکہ اور اقوام متحدہ لارڈ طارق احمد کے ساتھ ملاقات کی۔

حنا ربانی نے جمیکا کی وزیر خارجہ کمینا جانسن سمتھ، ڈومینیکا کے وزیر خارجہ ڈاکٹر کینتھ ڈیروکس اور سیرا لیون کے وزیر خارجہ پروفیسر ڈیوڈ جے فرانسس سے بھی ملاقاتیں کیں۔

واضح رہے کہ دولت مشترکہ کے حکومتی سربراہان کی میٹنگ تقریباً چار سال کے وقفے کے بعد ہو رہی ہے۔