37 سالہ ڈاکٹر جولی اسمتھ کو ویڈیو شیئرنگ ایپ ٹک ٹاک پر 34 لاکھ صارفین نے فالو کیا ہوا ہے۔

ڈاکٹر جولی اسمتھپیشے سے ایک ماہرِ نفسیات ہیں لیکن وہ  سوشل میڈیا پر بھی کافی متحرک ہیں۔

غیر ملکی خبررساں ادارے  کے مطابق کورونا وبا کے دوران ڈاکٹر جولی اسمتھ نے ویڈیو شیئرنگ ایپ ٹک ٹاک پر ذہنی تناؤ اور ڈپریشن کی آگاہی سے متعلق ویڈیوز بنانا شروع کیں۔

جب اُنہوں نے دیکھا کہ صارفین اُن کی ویڈیوز میں دلچسپی ظاہر کررہے ہیں تو ڈاکٹر جولی نے اپنی ویڈیوز میں چھوٹے چھوٹے نفسیاتی ٹوٹکے بھی بیان کرنا شروع کیے۔

ڈاکٹر جولی صرف دو سال کے عرصے میں دُنیا بھر میں مقبول ہوگئیں اور اس وقت ٹک ٹاک پر اُن کے فالوورز کی تعداد 34 لاکھ ہے۔

 جبکہ اُن کی تمام ویڈیوز پر کُل 39 اعشاریہ 9 ملین لائکس ہیں۔

تاہم یوٹیوب پر ڈاکٹر جولی اسمتھ کو 4 لاکھ سے زائد صارفین نے سبسکرائب کیا ہوا ہے۔

علاوہ ازیں رواں سال ڈاکٹر جولی نے ایک کتاب بھی لکھی ہے جس کا عنوان ’مجھے پہلے کسی نے یہ کیوں نہیں بتایا؟‘ ہے، اس کتاب کو بےحد مقبولیت بھی مل رہی ہے۔

واضح رہے کہ  برطانیہ میں پیدا ہونے والی ڈاکٹر جولی اسمتھ نے ’یونیورسٹی آف ایکسیٹر‘ سے نفسیات کی ڈگری حاصل کی۔