احسان شاہ نے کہا ہے کہ بجٹ میں بلوچستان کے تمام حلقوں کو یکساں ترقی دینے کا موقع دیا گیا ہے۔

صوبائی وزیر صحت سید احسان شاہ نے اظہار خیال کرتے ہوئے کہا کہ اپنی جانب سے اور اپنی پارٹی کی جانب سے وزیر اعلی اور انکی ٹیم کو بجٹ پر مبارکباد پیش کرتا ہوں۔

انہوں نے کہا کہ بجٹ میں بلوچستان کے تمام حلقوں کو یکساں ترقی دینے کا موقع دیا گیا ہے، بجٹ میں 50 ارب روپے پی پی ایل کی مد میں ملیں گے جو ایک بار ملیں گے۔

سید احسان شاہ نے کہا کہ اگلے سال یہ فنڈز نہیں ملے گے تو مالی مشکلات بڑھیں گی۔

صوبائی وزیر صحت سید احسان شاہ کا مزید کہنا تھا کہ موجودہ حکومت نے ریکوڑک کا شئیر بڑھا کر 25 فیصد کرایا جبکہ گزشتہ حکومت میں ریکوڈک میں بلوچستان کا شئیر 10 فیصد تھا۔

واضح رہے کہ بلوچستان اسمبلی کا بجٹ اجلاس ڈپٹی اسپیکر سردار بابر خان موسی خیل کی صدارت میں ہوا جس میں صوبائی وزیر خزانہ سردار عبدالرحمن کھیتران نے بجٹ پیش کیا تھا۔

بجٹ دستاویزات کے مطابق نئے مالی سال میں غیر ترقیاتی بجٹ کا حجم 367ارب روپے ہے جبکہ مجموعی صوبائی ترقیاتی بجٹ کا حجم۔191.5ارب روپے ہے۔

وزیر خزانہ نے بتایا کہ مالی سال 23-2022 میں بلوچستان کے نو جوانوں کے لیے روزگار کے مواقع پید ا کرنے کے لیے مختلف محکموں میں 2851 نئی آسامیاں رکھی گئیں ہیں۔

مالی سال 23-2022  میں گوادر شہر میں فراہمی آب کے لیے واٹر سپلائی کے لیے 38کروڑ روپے کی اسکیم رکھی گئی ہے،آب نو شی کے لیے ترقیاتی مد میں 23 ارب روپے اور غیر ترقیاتی مد میں بشمول واسا8ارب روپے مختص کیے گئے ہیں۔

 بجٹ دستاویزات کے مطابق بلوچستان کی صوبائی حکومت نے بھی سرکاری ملازمین کی تنخواہوں اور پنشن میں 15 فیصد اضافہ کیا ہے۔

وزیر خزانہ سردار عبدالرحمن کھیتران کا کہنا تھا کہ انشاءاللہ بلوچستان میں تاریخی روزگار کے مواقع پیدا کرینگے، ہماری حکومت شروع دن سے وسائل کی کمی کا شکاررہی ہے صحت کا نظام بہتر بنانا حکومت اولین ترجیح ہے جبکہ بلوچستان بھر کے ہسپتالوں میں 6 ارب روپے کی خطیر رقم سے ادویات کی کمی پوری کی جائے گئی۔