پنجاب میں سی این جی اسٹیشن کو گیس بحالی کا فیصلہ کرلیا گیا ہے۔

تفصیلات کے مطابق سوئی ناردرن گیس کا رواں ہفتے منگل اور جمعہ کے روز سی این جی اسٹیشن کو گیس بحالی کا فیصلہ کیا گیا ہے۔

پنجاب میں سی این جی اسٹیشن صبح 8 سے شام 8 بجے تک گیس فراہم کریں گے جبکہ  اگلے ہفتے کیلیے گیس فراہمی کا شیڈول بعد میں اعلان کیا جائے گا۔

پنجاب میں سی این جی اسٹیشنوں کو ہفتے میں دو روز کے لئے کھولنے پر مرکزی چیئرمین آل پاکستان سی این جی ایسوسی ایشن غیاث پراچہ نے کہا ہے کہ پنجاب اور اسلام آباد میں  سی این جی اسٹیشنوں کو ہفتے میں دو دن کھولنے کا فیصلہ منظور نہیں ہے۔

سوئی ناردرن کی صنعتی شعبوں کے لئے خوشخبری

انہوں نے کہا کہ ملک میں ایل این جی بھرپور  گنجائش کے مطابق آ رہی ہے ایسے میں سی این جی سیکٹر کو جزوی گیس سپلائی سمجھ سے بالا تر ہے۔

غیاث پراچہ نے مزید کہا کہ پچھلے تین سالوں میں ایل این جی مکمل درآمد کی صورت میں اسٹیشنز بند نہیں کئے جاتے تھے۔

واضح رہے کہ اس سے قبل ترجمان سوئی ناردرن گیس کے مطابق گزشتہ چند روز کے دوران سردی کی شدت میں اضافے کے باعث گھریلو صارفین کے گیس کے استعمال میں بے پناہ اضافہ دیکھنے میں آیا، گھریلو صارفین کو موسم سرما میں پریشانی سے بچانے اور گیس طلب پوری کرنے کے لیے پنجاب بھر میں عارضی طور پر جنرل انڈسڑی اور سی این جی سیکٹر کو گیس کی فراہمی بند کی جارہی ہے۔

ترجمان ناردرن گیس کے مطابق زیرو ریٹڈ انڈسٹری کو گیس سپلائی معمول کے مطابق جاری رہے گی، یہ فیصلہ ہنگامی صورتحال کے پیش نظر عارضی بنیادوں پر کیا گیا ہے صورتحال معمول پر آتے ہی جنرل انڈسٹری اور سی این جی سیکٹر کو گیس سپلائی بحال کردی جائے گی۔