چوہدری پرویز الہٰی نے کہا ہے کہ امپورٹڈ حکمران بری طرح ایکسپوز ہوچکے ہیں۔

اسپیکر پنجاب اسمبلی چوہدری پرویز الہٰی سے سابق وفاقی وزیر مونس الہٰی، پارٹی رہنماؤں اور وکلاء نے ملاقات کی جس میں پنجاب کی سیاسی صورتحال ، وزیر اعلیٰ پنجاب کے انتخاب بارے، عدالتی کیس اور دیگر معاملات پر بات چیت کی گئی۔

 چوہدری پرویز الہٰی نے کہا ہے کہ ڈپٹی اسپیکر کا پنجاب اسمبلی کے ایوان میں کردار متنازعہ ہو چکا ہے، ڈپٹی اسپیکر پنجاب اسمبلی دوست محمد مزاری سے انصاف کی کوئی توقع نہیں۔

انہوں نے کہا کہ ڈپٹی اسپیکر مسلم لیگ ن کے اجلاسوں میں بیٹھتے ہیں، ڈپٹی اسپیکر نے پہلے بھی جانبداری کا مظاہرہ  کیا، ایوان میں پولیس طلب کرکے اس کا تقدس پامال کیا۔

 اسپیکر پنجاب اسمبلی نے کہا کہ ڈپٹی اسپیکر کی جانب سے مقدس ایوان میں پولیس بلانے پر دنیا بھر میں پاکستان کی جگ ہنسائی ہوئی، کامن ویلتھ سمیت دنیا کی اہم جمہوری تنظیموں نے ڈپٹی اسپیکر کے عمل پر تشویش کا اظہار کیا۔

انہوں نے کہا کہ مسلم لیگ ن کے حق میں ان کے بیانات ان کے عمل کی عکاسی کرتے ہیں، ڈپٹی اسپیکر منحرف ارکان سے مل کر حمزہ شہباز کی حمایت کا اعلان کر چکے ہیں۔

چوہدری پرویز الہٰی نے کہا ہے کہ ڈپٹی اسپیکر نے آئندہ جنرل الیکشن ن لیگ کے ٹکٹ پر لڑنے کا اعلان بھی کیا ہے، ڈپٹی اسپیکر نے وزیر اعلیٰ کا غیر قانونی الیکشن کروایا، امپورٹد حکمران بری طرح ایکسپوز ہوچکے ہیں۔

 اسپیکر پنجاب اسمبلی نے کہا کہ ان نااہل حکمرانوں نے مہنگائی کے ریکارڈ قائم کر دیئے ہیں، عوام کو ریلیف دینے کے بجائے مہنگائی کا ہر روز نیا بم گرایا جارہا ہے، عوام ضمنی انتخابات میں ان حکمرانوں  کے خلاف ووٹ کی طاقت سے فیصلہ سنائیں گے۔