وزیراعلیٰ پنجاب سردار عثمان بزدار نے کہا ہے کہ پاکستان تبدیلی کی راہ پر چل پڑا ہے جبکہ یہ تبدیلی عوام کی بہتری کے لئے ہے اور تبدیلی کا سفر رکے گا نہیں ۔

تفصیلات کے مطابق وزیراعلیٰ پنجاب سردار عثمان بزدار سے صوبائی وزراء، اراکین اسمبلی اور تحریک انصاف کے عہدیداران کی ملاقات ہوئی ۔

اپنے بیان میں  وزیراعلیٰ پنجاب نے کہا کہ خلوص نیت اورمحنت کے ساتھ عوا م کی خدمت کر رہے ہیں، گزشتہ 30برس کے دوران آنے والی حکومتوں نے مسائل کے انبار لگائے۔

سردار عثمان بزدار  نے یہ بھی کہا کہ پنجاب میں کفایت شعاری اوربچت کی نئی مثالیں قائم کی ہیں جبکہ عوام کی بنیادی ضرورتیں حل کرنے کے معاملے میں پہلو تہی کی گئی۔

وزیراعلیٰ پنجاب سردار عثمان بزدار  نے مزید کہا کہ عوام کی فلاح و بہبود کے وہ کام کر رہے ہیں جو سابق حکمران برسوں میں نہ کر پائے جبکہ صوبے کے عوام کے مفاد میں جو کچھ بن پڑا وہ کر گزریں گے۔

ہماری نیت نیک ہے ،عوام کو دھوکہ نہیں دیں گے، عثمان بزدار

وزیر اعلی  پنجاب سے ملاقات کرنے والوں میں صوبائی وزراء سید حسین جہانیاں گردیزی، اسد کھوکھر،رکن پنجاب اسمبلی مسرت چیمہ،جمشید چیمہ، سابق نگران وزیر اعلی میاں افضل حیات، سابق رکن پنجاب اسمبلی شوکت محمود بسرا اور دیگر شامل تھے۔

واضح رہے اس سے قبل بھی وزیراعلیٰ پنجاب سردار عثمان بزدار نے اپنے ایک بیان میں کہا  تھا کہ تنقید کی کوئی پروانہیں، صرف عوام کی رائے کو اہمیت دیتا ہوں  جبکہ تحریک انصاف کے دور میں ملک پائیدار ترقی کی جانب گامزن ہے۔

 وزیراعلیٰ پنجاب کا کہنا تھا کہ مختصر مدت میں عوام کی فلاح و بہبود کیلئے بے شمار اقدامات کئے ہیں، حکومتی امور میں سادگی لانے سے اخراجات میں نمایاں کمی آئی ہے۔

وزیراعلیٰ پنجاب سردار عثمان بزدار کا مزید کہنا تھا  کہ ہماری سمت درست اور نیت نیک ہے ،عوام کو دھوکہ نہیں دیں گے اور نہ ہی شو بازیاں کریں گے۔