سندھ اور بلوچستان میں شدید بارشوں کی پیشگوئی کے بعد این ڈی ایم اے کی جانب سے بھی ضروری ہدایات جاری کردیں گئیں ہیں۔

تفصیلات کے مطابق نیشنل ڈیزاسٹر منیجمنٹ اتھارٹی نے متعلقہ محکموں کو ہدایت کی ہے کہ وہ سندھ اور بلوچستان میں آج سے شروع ہونے والی شدید بارشوں کے امکان کے طور پر ضروری انتظامات کریں۔

محکمہ موسمیات کی جانب سے جاری ایڈوائزری کے مطابق مون سون ہوائیں آج سے جنوب مشرقی سندھ اور بلوچستان میں تیز ہو جائیں گی جس کے باعث منگل تک موسلادھار بارش کا امکان ہے, جس کی وجہ سے نشیبی علاقوں میں سیلاب کا خطرہ ہے۔

Onset of #Monsoon Rains – Torrential Rains Likely in Sindh & Balochistan pic.twitter.com/56duZewIEg

Advertisement

— NDMA PAKISTAN (@ndmapk) July 1, 2022

خیال رہے کہ چیف میٹرولوجسٹ سردار سرفراز  نے مون سون بارشوں کی تازہ ترین صورت حال سے آگاہ کرتے ہوئے بتایا کہ 2 جولائی کی رات سے 5 جولائی تک سندھ میں گرج چمک کے ساتھ تیز بارش کا امکان ہے اور یہ بارشیں 5 جولائی تک جاری رہ سکتی ہیں۔

 انہوں نے کہا کہ 6 جولائی کو بھی شہر میں درمیانے درجے کی بارش ہوسکتی ہے اور 8 جولائی سے مون سون کا دوسرا اسپیل بارش برسائے گا جب کہ یہ اسپیل بھی 3 سے 4 روز پر محیط ہوگا۔

چیف میٹرولوجسٹ کا کہنا تھا کہ ہوا کا کم دباؤ اگر کراچی کے قریب سے گزرا تو شہر میں 60 تا 70 ملی میٹر بارش ہوسکتی ہے لیکن اگر یہ اسپیل کراچی کے اوپر سے گزرا تو 100 ملی میٹر سے زائد بارش کا امکان ہے۔