تیمور سلیم جھگڑا نے کہا ہے کہ حکومت نے مہنگائی سے غریب عوام کا جینا حرام کردیا ہے۔

صوبائی وزیر صحت و خزانہ تیمور سلیم جھگڑا نے پریڈ گراؤنڈ جلسہ گاہ روانگی سے  پہلے موٹروے انٹرچینج پر میڈیا سے گفتگو کرتے ہوئے کہا کہ امپورٹڈ حکومت کے خلاف آج  اسلام آباد پریڈ گراؤنڈ میں بڑا جلسہ ہوگا۔

انہوں نے کہا کہ حکومت نے مہنگائی سے غریب عوام کا جینا حرام کردیا ہے، اس گرمی میں بھی عوام کی اتنی بڑی تعداد امپورٹڈ حکومت کے خلاف نکلی ہے۔

   تیمور سلیم جھگڑا نے کہا کہ شہباز شریف نے ضم اضلاع کے عوام کے حق پر ڈاکہ ڈالا ہے، شہباز شریف نے ضم اضلاع کے عوام سے صحت کارڈ کی سہولت چھین لی ہے۔

 صوبائی وزیر صحت و خزانہ نے کہا کہ عمران خان کی حکومت نے 22 کروڑ عوام کو صحت کارڈ دیا تھا جس کو اب یہ حکومت عوام سے دوبارہ چھین رہی ہے۔

  دوسری جانب پاکستان تحریک انصاف کے رہنما فواد چوہدری نے پریڈ گراؤنڈ جلسہ گاہ میں میڈیا سے گفتگو کرتے ہوئے کہا تھا کہ ہرشخص عمران خان کے پیچھے کھڑا ہے بلکہ پاکستان کے پیچھے کھڑا ہے۔

انہوں نے کہا تھا کہ رات کو لاکھوں لوگ امپورٹڈ حکومت کے خلاف جلسے میں شامل ہونگے، رات کو پورے ملک میں لوگ مہنگائی کے خلاف نکلیں گے، 22 جولائی کو پنجاب میں پی ٹی آئی کی حکومت بنائیں گے۔

 فواد چوہدری نے کہا تھا کہ پنجاب کے بیس حلقوں میں لوٹے اپنی مہم شروع نہیں کر پا رہے، بیس حلقوں میں پی ٹی آئی کی اپوزیشن مستحکم ہے، ہم 22 جولائی کو پنجاب میں حکومت بنائیں گے۔

  پاکستان تحریک انصاف کے رہنما نے کہا تھا کہ جلد عمران خان دو تہائی اکثریت لے کر آئیں گے، ہمارے وزیر دفاع نفسیاتی مریض ہیں، امریکا میں پاکستانی سفیر کی اسناد 4 ماہ نہیں دی گئیں۔

انہوں نے کہا تھا کہ امریکہ کا سفیر پاکستان آیا تو روز صدر کو دفتر خارجہ فون کر کے کہ رہے ہیں کہ آپ اس کی اسناد قبول کریں۔