پیپلز پارٹی کے رہنما اور مشیر زراعت منظور وسان نے کہا ہے کہ پی ٹی آئی کے کچھ لوگ کرپشن کے الزام میں گرفتار ہونگے۔

منظور وسان نے سندھ ہائیکورٹ میں غیر رسمی گفتگو کرتے ہوئے کہا کہ یہ اہم اور خطرناک دن ہیں ، آج سے عمران خان کی پوزیشن کم ہوتی جائے گی۔

انہوں نے کہا کہ جب ضمنی الیکشن ہوں گے عمران خان ہارے گا نواز لیگ والے اکثر جیتیں گے، الیکشن 2023 میں ہوں بڑی بڑی اہم شخصیات عمران خان کو چھوڑ کر دوسری پارٹیوں میں چلے جائیں گے۔

پیپلز پارٹی کے رہنما نے کہا کہ عمران خان کے کچھ لوگ کرپشن کے الزام میں گرفتار ہوں گے، کرپشن کے جن الزامات میں دوسروں کو پھنسا جاتا تھا اب حقیقت سامنے آئے گی۔

منظور وسان نے کہا کہ میں اس نیب کی ترمیم کی حمایت نہیں کرتا اور نا ہی میرا کیس اس ترمیم کے ساتھ ہے، کاش تھوڑی دیر بعد ترمیم ہوتی ہم بھی اثاثہ جات کے کیس بناتے یہ جواب دیتے تو خوشی ہوتی۔

مشیر زراعت منظور وسان نے مزید کہا کہ ہوسکتا ہے الیکشن کے بعد خود عمران خان بیگم کے ساتھ باہر چلے جائیں۔

واضح رہے کہ سندھ ہائی کورٹ نے سابق وزیرداخلہ سندھ منظوروسان کی ضمانت میں توسیع کردی۔

 سندھ ہائی کورٹ میں آمدن سے زائد اثاثہ جات بنانے سے متعلق نیب انکوئری میں پیپلز پارٹی کے رہنما منظوروسان کی درخواست کی سماعت ہوئی۔