مویشی منڈی کے مرکزی روٹس اور دیگر ملحقہ سڑکوں پر سیکیورٹی کو مزید  سخت کرنے کے احکامات جاری کردیے گئے۔

تفصیلات کے مطابق  آئی جی سندھ غلام نبی میمن کی زیر صدارت اعلیٰ سطحی اجلاس  ہوا جس میں عید الاضحیٰ کے موقع پر قیام امن کے حوالے سے پولیس اقدامات کا تفصیلی جائزہ لیا گیا ۔

اجلاس میں سیکیورٹی صورتحال کو بہتر بنانے کے حوالے سے کچھ ضروری ہدایات  بھی جاری کی گئیں۔

آئی جی سندھ نے مویشی منڈی کے مرکزی روٹس اور دیگر ملحقہ سڑکوں پر سیکیورٹی کو مزید  سخت  کرنے کی ہدایت کی  ۔

غلام نبی میمن نے کہا کہ   عیدالاضحیٰ کنٹی جینسی پلان میں شامل سیکیورٹی امور واقدامات پر ان کی روح کے مطابق عمل درآمد اور ضلعی سطح پر سیکیورٹی فرائض پر تعینات پولیس افسران اور جوانوں کی بریفنگ کے عمل کو یقینی بنایا جائے۔

انہوں نے کہا کہ نماز عید کے مقامات، مساجد،امام بارگاہوں اوراجتماعی قربانی کے مقامات کے علاوہ مویشی منڈی کے مرکزی روٹس اور ملحقہ علاقوں کی سڑکوں پر تھانہ جات کی سطح پر سیکیورٹی کے مجموعی امور کو انتہائی ٹھوس اور غیرمعمولی بنایا جائے۔

آئی جی سندھ کا کہنا تھا کہ قربانی کے حوالے سے ترتیب دیئے گئے ضابطہ اخلاق پر عمل درآمد کو یقینی بنایا جائے اور اس ضمن میں رجسٹرڈ تنظیموں اور فلاحی اداروں کے متظمین ودیگر اسٹیک ہولڈرز کو اعتماد میں لیا جائے۔

غلام نبی میمن نے  ہدایات دیں کہ سندھ  کے تمام ہائی ویز پر مسافروں کے تحفظ کو یقینی بنایا جائے اور تمام   پولیس اضلاع متعلقہ موٹروے اور ہائی ویز پولیس سے روابط کو مزید موثر اور بہتر بنائیں۔

انہوں نے ہدایات دیں کہ صوبہ سندھ کے داخلی و خارجی راستوں پر چیکنگ اور نگرانی کے عمل کو غیرمعمولی بنانے کے ساتھ ساتھ ویڈیو ریکارڈنگ کو بھی یقینی بنایا جائے۔

آئی جی سندھ نے مزید کہا کہ شاہراہوں،ذیلی سڑکوں اور دیگر منتخب کردہ مقامات پر پولیس پکٹنگ، پیٹرولنگ کو باہم روابط کے تحت کامیاب اور نتیجہ خیز بنایا جائے۔ علاوہ اذیں ٹریفک کی روانی کو برقرار رکھنے کے لیے تمام تر ضروری اقدامات اختیار کیے جائیں۔

اجلاس میں ایڈیشنل آئی جی کراچی،ڈی زونل ڈی آئی جیز اور ضلعی ایس ایس پیز کراچی نے براہ راست جبکہ حیدرآباد، سکھر،شہید بینظیر آباد،لاڑکانہ اور میرپورخاص رینج کے ڈی آئی جیز وضلعی ایس ایس پیز نے  ذریعہ ویڈیولنک شرکت کی۔