کشمیر پریمئر لیگ سیزن 2022 میں شاہد آفریدی کو جموں جانباز کا مینٹور مقرر کردیا گیا ہے۔

کشمیر پریمئر لیگ سیزن 2022 کی فرنچائز جموں جانباز کی جانب سے مائیکرو بلاگنگ سائٹ پر اطلاع دی گئی ہے کہ شاہد آفریدی نے ان کی فرنچائز کو بطور مینٹور جوائن کرلیا ہے۔

The King of hearts and a cricketer who has been always ahead of his time, @SAfridiOfficial joins Jammu Janbaz as mentor and we won't be surprised if he plays a few matches as captain as well 😍🔥#JammuJanbaz #CricksLab #KhelJaanBaazoKa #ShahidAfridi #KPL2022 #CricketTwitter pic.twitter.com/d90YPRFmA8

— Jammu Janbaz (@JammuJanbaz) July 5, 2022

ان کا ٹوئٹ کرتے ہوئے کہنا تھا کہ دلوں کے بادشاہ اور ہمیشہ سے آگے رہنے والے کرکٹر شاہد خان آفریدی نے جموں جانباز کو بطور مینٹور جوائن کیا ہے اور ہمیں کوئی حیرانی نہیں اگر وہ بطور کپتان بھی کچھ میچز کھیلیں۔

واضح رہے کہ کشمیر پریمئیر لیگ کے دوسرے ایڈیشن میں پاکستان کے سینٹرل کنٹریکٹ میں شامل کھلاڑی شرکت نہیں کریں گےکیونکہ اس سیزن میں بھی پی سی بی نے سینٹرل کنٹریکٹڈ کرکٹرز کو این او سی نہ دینے کا فیصلہ کیا ہے۔

سینٹرل کنٹریکٹڈ کرکٹرز کو پہلے ایڈیشن میں بھی این او سی جاری نہیں کی گئی تھی جبکہ پاکستان کرکٹ بورڈ کے ذرائع کے مطابق سینٹرل کنٹریکٹ سے محروم فہیم اشرف کو بھی این او سی نہیں ملے گی۔

پی سی بی کے ذرائع کے مطابق مستقبل میں بین الاقوامی سطح پر آئی سی سی کے فیوچر ٹوررز پروگرام میں بہت زیادہ کرکٹ کی وجہ سے کھلاڑیوں کو محفوظ رکھنے کے لئے این او سی جاری نہیں کی گئی ہے۔

خیال رہے کہ کے پی ایل کے پہلے سیزن میں بھی اسی وجہ سے متعدد سابق کھلاڑیوں کو مدعو کیا گیا تھا جبکہ لیگ کے لئے یکم سے 25 اگست تک کی ونڈو رکھی گئی ہے۔