سابق ڈپٹی اسپیکر قومی اسمبلی قاسم خان سوری نے کہا ہے کہ پاکستان کی تاریخ میں سب سے زیادہ ٹیکس ہماری حکومت نے جمع کیا۔

قاسم خان سوری نے ملتان میں ہونے والے پی ٹی آئی کے جلسے سے خطاب کرتے ہوئے کہا کہ بیرونی سازش کے تحت عمران خان کی منتخب حکومت کو ختم کیا گیا، آپ سب کو اس دھمکی آمیز مراسلے کا علم ہے۔

ان کا کہنا تھا کہ پی ٹی آئی حکومت نے کورونا وبا کے دوران معیشت کو سنبھالا، پنجاب میں تمام خاندانوں کو صحت کارڈ مہیا کیے گئے۔

انہوں نے مزید کہا کہ 17جولائی کو ملتان کی غیرت مند عوام لوٹوں کو سبق سکھائیں گے۔

اس کے علاوہ سابق وزیر خارجہ شاہ محمود قریشی نے بھی جلسے سے خطاب کرتے ہوئے کہا کہ آج ہمارے پاس اقتدار نہیں لیکن پھر بھی لوگ شامل ہو رہے ہیں، ہمارے مدمقابل پرانی سیاسی جماعتیں اپنے کچھ علاقوں تک محدود ہو چکی ہیں۔

ان کا کہنا تھا کہ امپورٹڈ حکمرانو ں نے چند دنوں میں ملکی معیشت برباد کر دی تو زرا سوچیں کہ جن سے چند ہفتوں میں ملکی معیشت نہیں سنبھل سکی وہ آگے ملک کیا چلائیں گے؟ حکمرانوں کو عوامی دباؤ پر جلد الیکشن کا اعلان کرنا پڑے گا۔

انہوں نے کہا کہ 2018 کے انتخابات میں عوام نے عمران خان کو مینڈیٹ دیا پر عوام کا مینڈیٹ راتوں رات چوری کر لیا گیا، ہم امپورٹڈ حکمرانوں سے اپنا چوری شدہ مینڈیٹ واپس لیں گے۔