وزیراعظم شہباز شریف نے کہا ہے کہ حکومت کی کوشش ہے کہ ملک کو توانائی کے شعبے میں خودکفیل بنائے۔

تفصیلات کے مطابق وزیراعظم کے زیرِ صدارت انرجی ٹاسک فورس کا اہم اجلاس آج منعقد ہوا جس میں فیصلہ کیا گیا ہے کہ قومی سولر انرجی پالیسی کا اعلان یکم اگست کو کیا جائے گا جو کہ مشترکہ مفادات کونسل کی منظوری سے مشروط ہوگا۔

اجلاس میں اس بات پر اتفاق کیا گیا ہے کہ وزیرِاعظم ہاؤس اور وزیرِاعظم آفس کو ہنگامی بنیادوں پر ایک مہینے کے اندر شمسی توانائی پر منتقل کر دیا جائے گا۔

اس موقع پر وزیراعظم کا کہنا تھا کہ عوام کو سستی اور ماحول دوست بجلی کی فراہمی حکومت کی اولین ترجیح ہے۔

دوسری جانب سماجی رابطے کی ویب سائٹ پر بھی انہوں نے اپنے پیغام میں بتایا کہ اتحادی حکومت جلد ہی ملک کی پہلی جامع سولر پالیسی متعارف کرائے گی۔

I was briefed about the key solar energy initiatives earlier today. Coalition govt will soon introduce the country’s first comprehensive solar policy after approval of the CCI. Solar energy will drastically cut fuel imports, bring down cost of electricity & provide clean energy.

— Shehbaz Sharif (@CMShehbaz) July 7, 2022

انہوں نے کہا ہے کہ شمسی توانائی سے ایندھن کی درآمدات میں زبردست کمی آئے گی اور ساتھ ہی بجلی کی قیمت میں کمی آئے گی۔