وزیراعظم نے مردان میں پولیس چوکی میں دھماکے کے نتیجے میں ہونے والے جانی نقصان پر افسوس کا اظہار کیا ہے۔

تفصیلات کے مطابق آج صبح مردان شہر سے متصل پولیس چوکی چمتار میں دھماکہ ہوا جس کے نتیجے میں پولیس حوالدار شہید جبکہ 2 اہلکاروں سمیت 4 افراد زخمی ہوگئے ہیں۔

واقعے کا نوٹس لیتے ہوئے وزیراعظم نے کہا کہ صوبہ خیبرپختونخوا میں پولیس پر بڑھتے ہوئے حملوں اور شہادتوں پر بہت تشویش ہے۔

اس موقع پر وزیراعظم نے وزیر داخلہ رانا ثناء اللہ کو ہدایات جاری کی ہیں کہ صوبہ خیبرپختونخوا میں امن وامان کی صورتحال میں بہتری اور پولیس پر حملوں کے تدارک میں معاونت فراہم کریں۔

دوسری جانب انہوں نے وزیراعلیٰ خیبرپختونخوا کو بھی صوبے میں امن وامان سے متعلق درپیش صورتحال کا جائزہ لینے کی ہدایت کی ہے جس میں وفاق کی جانب سے بھرپور معاونت فراہم کرنے کی یقین دہانی کرائی گئی ہے۔

 اہلکاروں کی شہادت پر رنج و غم اور افسوس کا اظہار کیا ہے اور شہداء کے اہل خانہ اور زخمی ہونے والوں سے اظہار ہمدردی بھی کی ہے۔

اسکے علاوہ وزیراعظم نے شہداء کے اہل خانہ کو پولیس پیکج کے تحت امداد فراہم کرنے کی بھی ہدایت کی ہے۔

خیال رہے کہ دھماکے کے نتیجے میں حوالدار مقصود موقع پر شہید جبکہ اے ایس آئی سہیل، کانسٹیبل کریم سمیت دوعام شہری بھی دھماکے کی زد میں آکر زخمی ہوگئے۔

اطلاع ملتے ہی ریسکیو کی ٹیمیں دھماکے کی جگہ پہنچ گئیں شہید اور زخمیوں کو ایم ایم سی اسپتال منتقل کردیا۔

ریسکیو ذرائع نے بتایا کہ دھماکے سے پولیس چوکی کو نقصان پہنچا جبکہ دھماکے کی آواز دور دور تک سنی گئی۔