ہاردک پانڈیا کی شاندار اور متاثر کن پرفارمنس کے باعث بھارت نے انگلینڈ کو پہلے ٹی ٹوئنٹی میچ میں شکست دے دی ہے۔

جمعرات کو ایجیاس باؤل میں بھارت اور انگلینڈ کی ٹیموں کے درمیان ٹی ٹوئنٹی سیریز کا پہلا میچ کھیلا گیا جس میں بھارت نے ہاردک پانڈیا کی شاندار پرفارمنس کے باعث 50 رنز سے کامیابی اپنے نام کی۔

اسی کے ساتھ ہی بھارت کو تین میچز کی سیریز میں 1-0 کی برتری حاصل ہوگئی ہے جبکہ بہترین کھلاڑی کا اعزاز ہاردک پانڈیا کے نام رہا جنہوں نے 33 رنز دے کر 4 وکٹیں حاصل کیں اور بیٹنگ میں بھی ناقابل شکست نصف سنچری کی بدولت 51 رنز اسکور کیے تھے۔

بھارت کی اننگز

بھارت نے ٹاس جیت کر پہلے بیٹنگ کرنے کا فیصلہ کیا اور کپتان روہت شرما کے ساتھ ایشانت کشن نے اننگز کا آغاز کیا مگر روہت شرما تیز کھیلنے کی کوشش میں اپنی وکٹ گنوا بیٹھے اور 24 رنز پر پویلین لوٹ گئے۔

ایشانت کشن بھی وکٹ پر زیادہ دیر تک ٹہر نہ سکے اور 46 کے مجموعی اسکور پر وہ بھی 8 رنز کے اسکور پر پویلین لوٹ گئے۔

بھارت کی تیسری وکٹ 89 رنز پر گری جب دیپک ہودا 33 رنز بنا کر آؤٹ ہوئے، محتاط انداز میں اسکور آگے بڑھانے والے سوریا کمار یادیو 39 رنز بنا سکے۔

دوسرے اینڈ پر ہاردک پانڈیا نے بھارت کی ڈوبتی کشتی کو سنبھالا دیا اور 51 رنز بنائے، لیکن ان کا ساتھ دینے والے ایکسار پٹیل 17 رنز بنا کر آؤٹ ہو گئے۔

بھارت نے مقررہ 20 اوورز میں 8 وکٹوں کے نقصان پر 198 رنز بنائے، انگلینڈ کی جانب سے معین علی اور کرس جارڈن نے دو، دو وکٹیں حاصل کیں۔

انگلینڈ کی اننگز

انگلینڈ ہدف کے جواب میں 148 رنز پر ڈھیر ہوگئی جبکہ معین علی نے 36، ہیری بروک 28 اور کرس جارڈن 26 رنز بناکر نمایاں رہے۔

بھارت کی جانب سے ہاردک پانڈیا نے 4، ارشدیپ سنگھ اور یزویندر چہل نے 2،2 کھلاڑیوں کو آؤٹ کیا۔

واضح رہے کہ دونوں ٹیمیں ہفتے کو سیریز کا دوسرا میچ کھیلنے کے لیے ایجبسٹن روانہ ہوں گی۔