پاکستان تحریک انصاف کے رہنما شہباز گل نے کہا ہے کہ عمران خان کو اگلے الیکشن میں کسی اتحادی کی ضرورت نہیں پڑے گی۔

تفصیلات کے مطابق پاکستان تحریک انصاف کے رہنما شہباز گل نے پریس کانفرنس کرتے ہوئے کہا ہے کہ آج احسن اقبال نے اپنی پریس کانفرنس میں تہذیب اور تربیت پر بات کی، 1988 میں احسن اقبال کی تربیت کس نے کی تھی جب آپ نے شہید محترمہ بینظیر بھٹو کی جعلی تصاویر ہیلی کاپٹر سے پھینکی تھیں، کیا آپ کی تربیت عمران خان صاحب نے کی تھی؟

انہوں نے کہا کہ کل ایک واقعہ پیش آیا اگر دیکھا جائے تو ان کی نظر سے نا خوشگوار واقعہ ہے، چند خواتین اور بچوں نے ان کو دیکھ کر چور چور کے نعرے لگائے۔

شہباز گل نے کہا ہے کہ آپ ایک جعلی پروفیسر ہیں جس نے لبادہ اوڑھا ہوا ہے، مریم صفدر کی فیکٹری کے اصل ماسٹر مائنڈ آپ ہیں، گلوں بٹ و دیگر کی تربیت کیا عمران خان نے کی تھی؟

پاکستان تحریک انصاف کے رہنما نے کہا کہ مریم صفدر کچھ دیر پہلے کہتی تھی کہ پبلک میں جانا ہیلمٹ پہن کر جانا، کیا یہ تربیت عمران خان نے کی؟ کل سلمان شہباز نے کہا کہ عورتوں اور بچوں کو جوتے مارنا چاہئیں، کیا یہ عمران خان کی تربیت تھی؟

انہوں نے کہا کہ آپ لوگوں کو چائے چھوڑنے کا کہہ کر خود میکڈونلڈ کی گرم کافی پئیں گے تو عوام کو غصہ آئے گا، کسی کے پاس حق نہیں کہ وہ آپ کو چھوئے تاہم قانون آواز بلند کرنے سے نہیں روکتا۔

شہباز گل نے کہا ہے کہ احسن اقبال آپ نے نئی وی ایٹ گاڑی خریدی کیا عمران خان نے آپ کی تربیت کی؟ آپ کے وزیر داخلہ نے کہا کہ عورتوں اور بچوں کےلئے فریش آنسو گیس منگوائی ہے، کیا یہ عمران خان کی تربیت ہے؟

پاکستان تحریک انصاف کے رہنما نے کہا کہ آپ علامہ اقبال کی بہو جسٹس ناصرہ اقبال کے گھر دیواریں پھلانگ کر گھسے، کیا یہ بھی عمران خان کی تربیت تھی؟