معروف پاکستانی اداکار گوہر رشید نے اپنے نانا کے حوالے سے ایک بڑا انکشاف کیا ہے۔

ایک انٹرویو میں اداکار نے بتایا کہ مشہور عالمِ دین علّامہ غلام احمد پرویز ان کے نانا ہیں۔

دورانِ انٹرویو گوہر رشید کا کہنا تھا کہ میرے ہوش سنبھالنے تک نانا علّامہ غلام احمد پرویز  کا انتقال ہوچکا تھا، لیکن ان کی جو تعلیمات اور نظریہ تھا وہی میرا بھی ہے۔

گوہر رشید نے کہا کہ ہم نے دین کو بہت مشکل بنا دیا ہے، ہمارا دین ایسا نہیں، یہ تو بہت خوب صورت اور آسانیوں والا مذہب ہے۔

ان کا کہنا تھا کہ ہم نہ تو دقیانوسی ہیں اور نہ ہی بہت زیادہ آزاد خیال، ہمارے گھر کا ماحول بہت مثبت ہے۔

انہوں نے مزید کہا کہ بچپن ہی سے اپنے بڑوں کو زندگی کے ہر معاملے میں میانہ روی اور اعتدال اختیار کرتے اور اپنی اقدار و ثقافت کے ساتھ چلتے دیکھا۔ ہمیں سختی سے بڑوں، چھوٹوں سے عزت سے پیش آنے کا درس دیا گیا۔

مرزا گوہر نے اپنے پیشہ ورانہ سفر کے بارے میں بات کرتے ہوئے کہا کہ میں جب کراچی آیا تو پہلی ملازمت ایک نجی چینل میں بطور لائن پروڈیوسر تھی، کیریئر کی شروعات لائن پروڈیوسر کے شعبے ہی سے ہوئی اور بس، اُس کے بعد راہیں کُھلتی چلی گئیں، اس کے بعد ریڈیو، ٹی وی ڈراموں اور فلموں میں بھی کام کیا۔

انہوں نے انٹرویو میں مزید بتایا کہ اداکاری کے شعبے میں جب قدم رکھا تو والد کی جانب سے غصے کا سامنا کرنا پڑا تھا جبکہ والدہ نے بہت حوصلہ افزائی کی۔

اُن کا اپنے ڈراموں سے تعلق پر بات کرتے ہوئے کہنا ہے کہ  میرا ڈرامہ سیریل ’ڈائجسٹ رائٹر‘ بہت ہٹ ہوا تھا، اس کے بعد مَن مائل، عشقیہ، رازِ الفت، لاپتہ بھی بے حد پسند کیے گئے جبکہ فلموں میں ’رنگ ریزہ‘ اور ’سِیڈلنگز‘ ہٹ رہیں۔