ومبلڈن فائنل میں کامیابی کے باوجود معروف ٹینس کھلاڑی نوواک جوکووچ کی اے ٹی پی رینکنگ میں 4 درجے تنزلی ہو گئی ہے۔

تفصیلات کے مطابق نوواک جوکووچ نے اتوار کو کرگیوس کے خلاف اپنا ساتواں ومبلڈن ٹائٹل جیتنے کی خوشی منائی تھی۔

تاہم اس ہفتے کی اے ٹی پی رینکنگ میں 35 سالہ سربیائی کھلاڑی نمبر 3 سے نمبر 7 پر چار درجے گر گئے۔

اس کی وجہ یہ ہے کہ آل انگلینڈ کلب کی جانب سے روس اور بیلاروس کے کھلاڑیوں پر پابندی کے بعد اے ٹی پی نے اس سال ومبلڈن کے لیے کوئی رینکنگ پوائنٹس نہ دینے کا فیصلہ کیا تھا۔

ومبلڈن سے روکے جانے والے روس کے ڈینیل میدویدیف نے اپنا ٹاپ رینک برقرار رکھا ہے۔

رینکنگ میں میدویدیف کے بعد الیگزینڈر زویریف اور رافیل نڈال کا نمبر آتا ہے۔

دلچسپ بات یہ ہے کہ 25 سال میں یہ پہلا موقع ہے جب راجر فیڈرر کو اے ٹی پی رینکنگ میں جگہ نہیں ملی ہے۔

چونکہ درجہ بندی میں صرف پچھلے 52 ہفتوں میں حاصل کیے گئے پوائنٹس کو مدنظر رکھا جاتا ہے، اس لیے فیڈرر کو کوئی پوائنٹ نہیں ملا کیونکہ ان کا آخری میچ گزشتہ سال ومبلڈن میں ہوا تھا۔

نوواک جوکووچ نے یو ایس اوپن میں شرکت کے بارے میں اپنے شکوک و شبہات کا اظہار کیا کیونکہ وہ ویکسین کروائے بغیر وہاں نہیں جا سکتے

جوکووچ نے بلغراد میں ایک پریس کانفرنس میں کہا کہ اس وقت میں امریکہ نہیں جا سکتا، میں مثبت خبروں کی امید کر رہا ہوں، لیکن زیادہ وقت نہیں ہے، مجھے نہیں معلوم لیکن امید بہت ہے۔

انہوں نے کہا کہ میں یو ایس اوپن کھیلنا چاہتا ہوں لیکن اگر ایسا نہیں ہوتا ہے تو یہ دنیا کا خاتمہ نہیں ہے اور نہ ہی مجھے پہلا گرینڈ سلم جس سے دستبردار ہونا پڑے گا۔

ومبلڈن میں اپنی فتح کے ساتھ، جوکووچ کے پاس اب 21 گرینڈ سلیم ٹائٹلز ہیں، جو راجر فیڈرر کے 20 کی تعداد سے آگے ہیں۔

مردوں میں وہ صرف رافیل نڈال سے پیچھے ہیں جنہوں نے 22 گرینڈ سلیم ٹائٹل جیتے ہیں۔