اسپیکر پنجاب اسمبلی چوہدری پرویزالہٰی نے پیکا آرڈیننس 2016 کو فوری طور پر منسوخ کرنے کا مطالبہ کردیا ہے۔

چوہدری پرویزالہٰی سے کونسل آف پاکستان نیوز پیپر ایڈیٹرز (سی پی این اے) کے رہنماؤں کی اسمبلی چیمبر میں ملاقات ہوئی جس میں   پرویزالہٰی نے کونسل آف پاکستان نیوز پیپر ایڈیٹرز کے مطالبات کی مکمل حمایت کی۔

ملاقات میں پرویزالہٰی نے گفتگو کرتے ہوئے کہا کہ نواز شریف اور حواریوں نے پیکا آرڈیننس ’آزاد سوچ اور آوازوں‘ کو ہمیشہ کےلئے بند کرنے کے لیے متعارف کروایا۔

ملاقات میں اسپیکر چوہدری پرویزالہٰی نے پیکا آرڈیننس 2016 کو فوری طور پر منسوخ کرنے کا مطالبہ کردیا ہے۔

انہوں نے کہا کہ پیکا آرڈیننس صحافی برادری اور پاکستان کے عوام کے ساتھ حکومت کا امتیازی سلوک ہے۔

علاوہ ازیں ملاقات میں پرویز الہٰی نے بین الاقوامی میڈیا کو الیکشن کی کوریج کرنے کی دعوت دی تاکہ الیکشن کی شفافیت کو یقینی بنایا جا سکے۔

انہوں نے کہا کہ میڈیا ریاست کا چوتھا ستون ہے، اس کی آزادی پر مکمل یقین رکھتے ہیں، میڈیا کی آزادی پاکستان کی ترقی کیلئے بھی بہت ضروری ہے، میڈیا کی آزادی پر کسی قسم کی بھی قدغن لگانا ہمارے اپنے مفاد میں نہیں۔

اسپیکر پنجاب اسمبلی کا کہنا ہے کہ ہمیشہ میڈیا کی آزادی اور اس کے ورکرز کی فلاح و بہبود کیلئے کام کیا، آزاد میڈیا پاکستان کی سلامتی اور بقا کیلئے انتہائی ضروری ہے۔

چوہدری پرویزالہٰی نے مزید کہا کہ پاکستان مسلم لیگ کے دور حکومت میں الیکٹرانک میڈیا کے ریکارڈ لائسنس جاری ہوئے، اپنے دور حکومت میں بھی میڈیا کی تنقید کو کھلے دل سے قبول کیا، میڈیا کی تنقید سے ہمیشہ اصلاح کا پہلو لیا۔

واضح رہے کہ ملاقات میں (سی پی این اے) کے صدر کاظم خان، ارشاد عارف، شہریار تاثیر، ضیاء تنولی، زبیر محمود اور ایاز خان شامل تھے۔