سرینگر: مقبوضہ کشمیر میں بھارتی فوجی نے اپنے ہی ساتھیوں پر فائرنگ کر دی جس کے نتیجے میں 3 اہلکار ہلاک اور متعدد زخمی ہو گئے۔

کشمیر میڈیا سروس کے مطابق بھارت کے غیر قانونی زیر قبضہ جموں و کشمیر کے ضلع پونچھ میں بھارتی فوج کے ایک کیمپ کے اندر فائرنگ کے نتیجے میں 3 فوجی ہلاک جبکہ متعدد اہلکار زخمی ہوگئے۔

فائرنگ کا واقعہ گزشتہ روز ضلع کے علاقے سورنکوٹ میں قائم فوج کے ایک کیمپ میں پیش آیا جس کے باعث تین فوجی ہلاک جبکہ کم از کم چار زخمی ہوگئے۔

 واقعے کی صحیح وجہ معلوم نہیں ہوسکی ہے تاہم شبہ ہے کہ اہلکاروں نے ایک دوسرے پر فائرنگ کی ہو یا پھر یہ حادثاتی فائرنگ کا واقعہ ہوسکتا ہے، ذرائع کا یہ بھی کہنا ہے کہ فائرنگ کرنے والے اہلکار نے خود کو بھی گولی مار کر خودکشی کر لی۔

ایک پولیس اہلکار نے ذرائع ابلاغ کو بتایا کہ واقعے کے حوالے سے حقائق کا پتہ لگایا جا رہا ہے اور فی الحال فائرنگ کی حتمی وجوہات کے حوالے سے کچھ نہیں کہا جا سکتا۔

دریں اثنا یہ واقعہ اس وقت پیش آیا جب بھارتی فوجیوں کو آر او پی (روڈ اوپننگ پارٹی) کے فرائض کے لیے تعینات کیا جا رہا تھا۔

واضح رہے کہ ایک فوجی کے ہاتھوں دوسرے فوجی کی ہلاکت کے ماضی میں بھی کئی واقعے رونما ہو چکے ہیں۔ سن 2011 میں اننت ناگ میں واقع ایک ملٹری کیمپ میں ایک فوجی نے اپنے چار ساتھیوں کو ہلاک کر دیا تھا۔