شاداب خان سمیت کئی کھلاڑیوں نے ون ڈے انٹرنیشنل فارمیٹ سے ریٹائرمنٹ لینے والے بین اسٹوکس کو خراج تحسین پیش کیا ہے۔

حال ہی میں انگلینڈ کے 31 سالہ کھلاڑی بین اسٹوکس نے ون ڈے انٹرنیشنل سے ریٹائرمنٹ کا اعلان کیا ہے جس پر قومی کرکٹر شاداب خان کا ردعمل بھی سامنے آیا ہے۔

شاداب خان کا مائیکرو بلاگنگ سائٹ پر کہنا تھا کہ ون ڈے کرکٹ بین اسٹوکس کی خدمات سے محروم ہونے جارہی ہے جبکہ وہ اس کھیل کے عظیم سفیر رہے ہیں۔

Congratulations on a wonderful ODI career @benstokes38. Best of luck with your Test career and other commitments. ODI cricket will surely miss you. https://t.co/0mktfhTimD

— Shadab Khan (@76Shadabkhan) July 18, 2022

انہوں نے شاندار ون ڈے کیریئر پر بین اسٹوکس کو مبارکباد بھی پیش کی جبکہ شاداب نے ان کے ٹیسٹ اور دیگر کرکٹ کیریئر کے لیے نیک خواہشات کا بھی اظہار کیا ہے۔

انہوں نے مزید لکھا کہ ’ون ڈے کرکٹ یقیناً آپ کی کمی محسوس کرے گی‘۔

واضح رہے کہ بین اسٹوکس اپنے 11 سالہ ون ڈے انٹر نیشنل کیریئر میں اب تک 104 میچز کھیل چکے ہیں جس میں انہوں نے 3 سنچریز اور 21 نصف سنچریز کی بدولت 2919 رنز اسکور کیے جبکہ 74 وکٹیں بھی حاصل کی ہیں۔

علاوہ ازیں انگلینڈ کو پہلی مرتبہ آئی سی سی ورلڈکپ میں فتح دلوانے کا سہرا بھی بین اسٹوکس کے ہی سر جاتا تھا۔

انہوں نے 2019 میں نیوزی لینڈ کے خلاف 84 رنز کی ناقابل شکست اننگز کھیل کر میچ کو سپر اوور تک لے جانے اور پھر وہاں سے فتح دلوانےمیں اہم کردار ادا کیا تھا۔

دوسری جانب بین اسٹوکس کا ریٹائرمنٹ کا اعلان کرتے ہوئے کہنا تھا کہ یہ فیصلہ آسان نہیں تھا، میں منگل کو ڈرہم میں ون ڈے کرکٹ میں انگلینڈ کے لیے اپنا آخری میچ کھیلوں گا۔

انہوں نے مزید کہا تھا کہ میں اس فارمیٹ میں اب مزید اپنا 100 فیصد نہیں دے سکتا اور انگلینڈ کی شرٹ اس سے کم قیمت کی مستحق نہیں ہے۔