پاکستان تحریک انصاف (پی ٹی آئی) کے رہنما میاں اسلم اقبال نے کہا ہے کہ عوام پاکستان میں صاف ستھری سیاست چاہتی ہے۔

میاں اسلم اقبال نے انسداد دہشتگردی عدالت کے باہر میڈیا سے گفتگو کرتے ہوئے کہا کہ عمران خان کا بیانیہ جیت چکا ہے، انکی شکست سامنے آگئی جو بیرونی طاقتوں کا آلہ کار بنے۔

انہوں نے کہا کہ اگر ووٹر لسٹیں ٹھیک ہوتیں تو ٹرن آؤٹ 80 فیصد ہوتا، ووٹروں کو تنگ کیا گیا، ووٹر لسٹوں میں خامیاں دور کرنی چاہیں۔

میاں اسلم اقبال نے کہا کہ گولی لاٹھی کی سرکار رد کردی گئی، عوام نے 17 جولائی کو ہمیں ووٹ دیا، عوام پاکستان میں صاف ستھری سیاست چاہتے ہیں، ہم انکوائریاں کرائیں گے۔

پی ٹی آئی کے رہنما نے کہا کہ پولیس افسران کے خلاف کارروائیاں ہوں گی جنہوں نے چادر چار دیواری کا تقدس پامال کیا۔

انہوں نے کہا کہ کوئی افسر نہ سمجھے کہ ہم بھول گئے ہیں، کوئی سی سی پی او، کوئی ڈی آئی جی کوئی ایس ایس نہ سمجھے کہ ہم بھول گئے، ہم کسی کے ساتھ پرسنل نہیں ہیں۔

میاں اسلم اقبال نے کہا کہ یہ انکوائریاں ہوں گی اور ظالم چہرے سامنے آئیں گے، پولیس کی وردی پہن کر ظلم کرنے والے سامنے آئیں گے اور بھگتیں گے۔

انہوں نے مزید کہا کہ اللہ کی لاٹھی بے آواز ہے، عوام نے سب کو بتا دیا کہ یہ ڈرامہ نہیں چلے گا، ظلم کی رات چھٹ گئی، عمران خان کا بیانیہ جیت چکا ہے، چور ڈاکو اور لٹیرے ہار چکے ہیں، عوام نے چوروں، ڈاکوؤں اور لٹیروں کو رد کر دیا۔