پاکستان تحریک انصاف کی رہنما ڈاکٹر یاسمین راشد نے کہا ہے کہ مجھے کسی عہدے میں دلچسپی نہیں۔

تفصیلات کے مطابق پاکستان تحریک انصاف کی رہنما ڈاکٹر یاسمین راشد نے میڈیا سے گفتگو کرتے ہوئے کہا ہے کہ خان صاحب کے موقف کی تائید ہوئی ہے۔

انہوں نے کہا کہ خان صاحب کہہ چکے ہیں کہ پرویز الہٰی وزیر اعلیٰ ہوں گے، مجھے کسی عہدے میں دلچسپی نہیں ہے، ہم اپنا کام مکمل کریں گے۔

 دوسری جانب پاکستان تحریک انصاف کے رہنما فرخ حبیب نے پریس کانفرنس کرتے ہوئے کہا کہ ضمنی انتخابات میں پی ٹی آئی کا ساتھ دینے پر عوام کے شکر گزار ہیں، دھاندلی کے باوجود لوگ عمران خان کے ساتھ کھڑے ہوئے۔

تحریک انصاف کی ضمنی الیکشن میں جیت

پنجاب کے 20 حلقوں میں ہونے والے ضمنی انتخابات کے غیر حتمی اور غیر سرکاری نتائج کے مطابق پاکستان تحریک انصاف نے 15 نشستیں اپنے نام کرلی تھیں جب کہ مسلم لیگ (ن) کو صرف 3 سیٹوں پر کامیابی ملی اور ایک سیٹ آزاد امیدوار کے حصے میں آئی۔

پنجاب کے وزارت اعلیٰ کی سیٹ اب تحریک انصاف کے امیدوار کی ہوگی، پی ٹی آئی اتحاد نے 186 نشستیں حاصل کرلیں۔

یاد رہے کہ پنجاب میں پی ٹی آئی کی 176 اور مسلم لیک (ق) کی 10 نشستیں ہیں۔

تحریک انصاف کی ضمنی الیکشن میں جیت پر اوورسیز پاکستانیوں کا عمران خان کو مبارکباد

تحریک انصاف کی ضمنی الیکشن میں واضح برتری کے حوالے سے بیرون ملک میں اوورسیز پاکستانیوں کا ردعمل سامنے آگیا۔

فرانس میں اوورسیز پاکستانیوں کا کہنا تھا کہ پی ٹی آئی کے لیے خوشی کا دن ہے ضمنی انتخابات میں پی ٹی آئی نے تاریخی کامیابی حاصل کی۔

اوورسیز پاکستانیوں نے کہا تھا کہ ہم کامیاب ہونے والے امیدوارں، سپورٹرز ، ورکرز اور لیڈرشپ کو دل کی گہرائیوں سے مبارکباد پیش کرتے ہیں۔