سری لنکا کی پارلیمانی ارکان  نے 6 بار وزیر اعظم رہنے والے رانیل وکرما سنگھے کو صدرمنتخب کر لیا ہے۔

ملک کے نئے صدر کے انتخاب کے لیے ہونے والی ووٹنگ میں وکرما سنگھے کو 134 ووٹ ملے جب کہ ان کے مدمقابل امیدوار نے 84 ووٹ حاصل کیے۔

 خبر ایجنسی کے مطابق سری لنکن پارلیمان میں صدر کے انتخاب کا عمل مکمل کر لیا گیا ، 6 بار وزیراعظم رہنے والے رانیل وکرما سنگھے کو صدرمنتخب کر لیا گیا ہے۔

میڈیا رپورٹ کے مطابق صدارتی انتخاب میں قائم مقام صدر رانیل وکرما سنگھے سمیت 3 صدارتی امیدوار مدمقابل تھے، وزیراعظم وکرما سنگھے بطورعبوری صدر بھی فرائض سرانجام دے رہے تھے جنہیں اب پارلیمنٹ نے باضابطہ صدر منتخب کیا ہے۔

وکرما سنگھے کو ملک کی خراب معاشی اور امن و امان کی صورتحال کو بہتر کرنے کا چیلنج درپیش ہے، صدر منتخب ہونے کے انہوں نے اپوزیشن جماعتوں سے ملک کی بہتری کے لیے متحد ہوکر کام کرنے کا مطالبہ کیا۔

صدر منتخب ہونے کے بعد پارلیمنٹ میں اظہار خیال کرتے ہوئے کہا کہ اس وقت قوم بہت مشکل صورتحال میں ہے اور ہمارے آگے بہت بڑے چیلنجز ہیں، ملک میں سیاسی استحکام اورآئی ایم ایف کے بیل آؤٹ پیکج کی بحالی کے لیے جلد از جلد کام کریں گے۔

رانیل وکرما سنگھے 2024 تک سری لنکا کے صدر رہیں گے 2 سال کے بعد ملک میں نئے انتخابات ہونگے۔

واضح رہے کہ  سری لنکا میں بدترین معاشی بحران پر پر تشدد احتجاج کے بعد سابق صدرگوٹابایا راجا پاکسے عہدے سے مستعفی ہو گئے تھے۔