گال: قومی کرکٹ ٹیم کے کپتان بابر اعظم نے کہا کہ اللہ کا شکر ادا کرتا ہوں جو پلان کیا تھا ویسے ہی پرفارمنس دی۔

قومی ٹیم کے کپتان بابر اعظم نے میچ جیتنے کے بعد پریس کانفرنس میں کہا کہ گال کی پچ میں اسپنرز کو مدد ملتی تھی اور اسپنرز نے ہی اچھا پرفارم کیا اور رزلٹ ہمارے ہاتھ میں آیا جبکہ پاکستان نے ہمیشہ فاسٹ باولرز بنائے ہیں اور فاسٹ باولرز نے فلیٹ ٹریک پر پاکستان کو میچز جتوائے ہیں۔

کپتان بابر اعظم نے کہا کہ دوسرے میچ میں دیکھیں گے کہ کس کنڈیشن کے ساتھ جانا ہے، ہرمیچ میں اچھا بھی ہوتا اور برا بھی ہوتا ہے بری چیزوں کو بہتر کرنے کی کوشش کرینگے۔

انہوں نے کہا کہ میرے لئے گال میں سنچری بنانا یادگار رہے گا، مشکل کنڈیشن میں سنچری بنانا یادگار رہتا ہے کیوںکہ لوئر آرڈرکے ساتھ کھیلنا بہت مشکل کام ہے انکو بھی سمجھانا پڑتا ہے۔

بابر اعظم نے کہا کہ نوجوان ہونے کے ناطے ہم مختلف کنڈیشن میں منواتے ہیں تب آپکی صلاحیتوں کا پتا لگتا ہے، انہیں میں سے عبداللہ شفیق ہیں وہ ایک بہترین کھلاڑی ہے بہترین شاٹس کھیلتا ہے امید ہے آگے عبداللہ بہت پرفارمنسز دیں گے۔

کپتان بابر اعظم نے کہا کہ پرباتھ جے سوریا سری لنکا کے اہم کھلاڑی ہیں، اپنی پرفارمنس پر فوکس کرینگے اور دوسرا میچ جیتیں گے۔

واضح رہے کہ پاکستان نے دو ٹیسٹ میچوں کی سیریز کے پہلے میچ میں سری لنکا کو دلچسپ مقابلے کے بعد 4 وکٹوں سے شکست دی، پاکستان کی جیت میں عبداللہ شفیق کی 408 گیندوں پر 160رنز کی اننگز نے اہم کردار ادا کیا اور عبداللہ شفیق میچ کے بہترین کھلاڑی بھی قرار پائے۔