پاکستان تحریک انصاف (پی ٹی آئی) کے رہنما سینیٹر فیصل جاوید نے کہا ہے کہ آج انشاءاللہ تحریک انصاف کے امیدوار وزیر اعلیٰ بنیں گے۔

سماجی رابطے کی ویب سائٹ ٹوئٹر پر اپنے جاری کردہ بیان میں سینیٹر فیصل جاوید نے کہا کہ وقت آگیا ہے کہ ہم موجودہ پارلیمانی نظام کی خامیوں پر سنجیدگی سے غور کریں۔

پی ٹی آئی رہنما نے کہا کہ کیا وزیراعظم یا وزیر اعلیٰ کے انتخاب میں عوام کے مینڈیٹ کی براہ راست ترجمانی ہوتی ہے؟

وقت آگیا ہے کہ ہم موجودہ پارلیمانی نظام کی خامیوں پر سنجیدگی سے غور کریں – کیا وزیراعظم یا وزیر اعلیٰ کے انتخاب میں عوام کے مینڈیٹ کی براہ راست ترجمانی ہوتی ہے ؟ پیسے کے لین دین، ضمیر فروشی، اپنے مفادات کے لیے عوامی ووٹ کی حق تلفی کرنا اس بلواسطہ انتخاب میں شفافیت پر داغ ہیں-

Advertisement

— Faisal Javed Khan (@FaisalJavedKhan) July 21, 2022

انہوں نے کہا کہ پیسے کے لین دین، ضمیر فروشی، اپنے مفادات کے لیے عوامی ووٹ کی حق تلفی کرنا اس بلواسطہ انتخاب میں شفافیت پر داغ ہیں، جس کو عوام نے ووٹ دیکر اسمبلی میں اکثریت دی وہ ہی حقدار ہے۔

فیصل جاوید نے کہا کہ چیف ایگزیکٹو کے بلواسطہ انتخاب کا نظام انتہائی غیر جمہوری ہے، ضمیر فروشی اور لین دین سے عوام کے مینڈیٹ کی نفی کی جاتی ہے، ایسے نظام کو بدلنا ناگزیر ہے۔

انکا کہنا ہے کہ چیف ایگزیکٹو کا انتخاب عوام کے ڈائریکٹ ووٹ سے ہونا چاہیے، آج انشاء اللہ تحریک انصاف کے امیدوار وزیر اعلیٰ بنیں گے، مگر ہمیں پھر بھی نظام کی بہتری کے لیے گریٹ ڈبیٹ کی ضرورت ہے۔

پی ٹی آئی رہنما نے مزید کہا کہ عوام کے ووٹ ڈائریکٹ چیف ایگزیکٹو کا انتخاب کریں کیونکہ عوامی نمائندے تو خریدے جا سکتے ہیں مگر یہ عظیم قوم غلام نہیں اور نہ بکنے والے ہیں۔