پاکستان تحریک انصاف کے رہنما راجہ بشارت کا کہنا ہے کہ چوہدری پرویزالہیٰ ہی وزیراعلیٰ پنجاب ہونگے۔

سابق وزیر قانون پنجاب راجہ بشارت نے لاہور میں میڈیا سے گفتگو کرتے ہوئے کہا کہ اللہ کے فضل سے 186 اراکین موجود ہیں، سب اکھٹے آپ کے سامنے آ رہے ہیں۔

انہوں نے کہا کہ یہ ہمارے مینڈیٹ کو چوری کرنے کی کوشش کرتے رہے ہیں، چوہدری پرویز الہٰی وزیر اعلیٰ ہوں گے۔

راجہ بشارت نے کہا کہ کسی صورت اجلاس ملتوی نہیں ہو گا، یہ الیکشن سپریم کورٹ کی روشنی میں ہونے جا رہا ہے۔

پی ٹی آئی رہنما نے مزید کہا کہ ڈپٹی اسپیکر کے خط کی کوئی اہمیت نہیں، جمہوری کے لئے جو تھریٹ بنا ہوا تھا زرداری اس کو منہ کی کھانی پڑی ہے۔

واضح رہے کہ پنجاب میں وزیراعلیٰ پنجاب کے انتخاب کے لئے صوبائی اسمبلی کا اہم اجلاس آج ہوگا جس میں  حمزہ شہباز اور چوہدری پرویز الہٰی آمنے سامنے ہونگے۔

سپریم کورٹ کے حکم پر پنجاب اسمبلی کا اجلاس آج شام چار بجے ہوگا جس کی صدارت ڈپٹی اسپیکر سردار دوست محمد مزاری کریں گے۔

پاکستان تحریک انصاف اور مسلم لیگ ن دونوں کی جانب سے جیت کے دعوے کیے جارہے ہیں، پی ٹی آئی کے 188 ن لیگ اور اتحادیوں کے 178 اراکین اسمبلی کا ٹاکرا ہوگا جن میں تحریک انصاف کے 2 ارکان اپنا ووٹ کاسٹ نہیں کرسکیں گے۔

ارکان آج شو آف ہینڈ کے ذریعے حق رائے دہی استعمال کریں گے، پنجاب اسمبلی میں پی ٹی آئی کے ضمنی انتخابات میں کامیاب ہونے والے 15، مسلم لیگ (ن) کے 3 اور ایک آزاد رکن نے حلف اٹھا لیا جو ووٹنگ میں حصہ لیں گے۔