آسٹریلیا کے معروف کرکٹر عثمان خواجہ نے کہا ہے کہ اگر بگ بیش کی ٹیموں کی نجکاری نہیں کی گئی تو ہم پیچھے رہ جائیں گے۔

تفصیلات کے مطابق ایک خبر رساں ادارے کو انٹرویو میں عثمان خواجہ نے کہا ہے کہ دنیا بھر میں ٹی 20 کرکٹ میں مسابقت بڑھ رہی ہے۔

عثمان خواجہ کا کہنا تھا کہ اگر ملک کی بگ بیش لیگ کو مسابقت کی اس جنگ میں آگے بڑھنا ہے تو لیگ میں نجی ملکیت کے لیے دروازہ کھولنا ہوگا۔

غیر ملکی خبروں کے مطابق بگ بیش لیگ کا اگلا ایڈیشن رواں سال دسمبر تا فروری 2023 کے اوائل میں ہو گا، اور اسی دوران جنوبی افریقہ بھی 6 ٹیموں پر مشتمل نئی ٹی ٹوئنٹی لیگ کا آغاز کرنے بھی جا رہا ہے۔

واضح رہے کہ انڈین پریمیئر لیگ کی ٹیموں کے مالکان نے جنوبی افریقہ میں تمام تر 6 فرنچائزز کو خرید لیا ہے جبکہ بگ بیش لیگ کی 8 ٹیموں کی ملکیت کرکٹ آسٹریلیا کی گورننگ باڈی کے پاس ہے جسے ریاستی ایسوسی ایشن کے ذریعے چلایا جاتا ہے۔

متحدہ عرب امارات میں بھی اگلے سال جنوری میں نئی لیگ کا انعقاد ہونے جا رہا ہے جس میں زیادہ تر سرمایہ کاری آئی پی ایل کی ہے۔

عثمان خواجہ نے انٹرویو میں کہا کہ دنیا بھر میں نئی لیگز کا انعقاد شروع ہونے جا رہا ہے اور ان لیگز میں ٹیموں کی نجکاری بھی ہو رہی ہے، اس لیے ہمیں بھی کھیل کے آگے بڑھنے سے خوفزدہ نہیں ہونا چاہیے۔

خبر رساں ادارے کے رپورٹر کے ایک سوال کے جواب میں خواجہ نے کہ اگر بگ بیش لیگ میں نجکاری کا عمل شروع نہیں کیا گیا تو مستقبل قریب میں مواقع محدود ہو جائیں گے اور ہم پیچھے رہ جائیں گے۔

بگ بیش لیگ کے ابتدائی ڈرافٹ میں دنیا بھر کے ٹاپ کھلاڑیوں کو نامزد کیا گیا ہے جس میں راشد خان، کیرون پولارڈ، ڈیوائن براوو کے علاوہ بابر اعظم، محمد رضوان اور شاہین شاہ آفریدی کی شمولیت کا بھی امکان ہے۔