وزیر اعلیٰ خیبر پختونخوا محمود خان نے کہا ہے کہ ہم نے عوام کو زیادہ سے زیادہ ریلیف دینا ہے۔

تفصیلات کے مطابق وزیر اعلیٰ خیبر پختونخوا محمود خان کی زیر صدارت ترقیاتی منصوبوں سے متعلق اہم اجلاس ہوا جس میں صوبے بھر میں مختلف شعبوں کے تحت میگا ترقیاتی منصوبوں پر پیشرفت کا جائزہ لیا گیا۔

اجلاس میں ایڈیشنل چیف سیکرٹری سمیت متعلقہ محکموں کے انتظامی سیکرٹریز اور دیگر حکام نے شرکت کی۔

  وزیر اعلیٰ خیبر پختونخوا نے ارباب نیاز کرکٹ اسٹیڈیم کی اپگریڈیشن پر کام کی سست روی پر برہمی کا اظہار کیا۔

محمود خان نے کہا کہ متعلقہ ٹھیکیدار کے خلاف سخت کارروائی عمل میں لائی جائے، مانیٹرنگ اینڈ ایوالویشن رپورٹ کی روشنی میں محکمہ اسپورٹس کے متعلقہ حکام کے خلاف بھی کارروائی عمل میں لائی جائے۔

اجلاس میں وزیر اعلیٰ نے سیف سٹی پروجیکٹ پر عملدرآمد میں تاخیر پر بھی تشویش کا اظہار کیا، منصوبے پر عملدرآمد کے لیے متعلقہ اعلیٰ حکام کا خصوصی اجلاس بلانے کی ہدایت دی۔

انہوں نے کہا کہ دیر موٹروے منصوبے کی الائمنٹ جلد سے جلد کلیئر کرکے سیکشن فور نافذ  کیا جائے، سوات موٹروے فیز ٹو پر ایک ہفتے میں عملی کام کا آغاز کیا جائے، سیکرٹری مواصلات دیر میں سڑکوں کے جاری منصوبوں کا وزٹ کرکے تفصیلی رپورٹ پیش کرے۔

محمود خان نے کہا کہ پشاور ڈی آئی خان موٹروے منصوبے پر عملدرآمد کے لیے تمام دستیاب آپشنز استعمال کیے جائیں، یہ صوبے کی پائیدار بنیادوں پر ترقی کے لیے اہم منصوبہ ہے، صوبائی حکومت ہر قیمت پر اس منصوبے کو عملی جامہ پہنائے گی۔

وزیر اعلیٰ خیبر پختونخوا نے کہا کہ لائیو اسٹاک یونیورسٹی سوات میں ستمبر تک کلاسز کے اجراء کے لیے انتظامات مکمل کیے جائیں، تحصیل واڑی اور الائی کو اضلاع کا درجہ دینے کیلئے ہوم ورک شروع کیا جائے۔

انہوں نے کہا کہ دیر تالاش میں این ایچ اے کی سڑک پر نالے کے اوپر پل کی تعمیر کے لیے منصوبہ تیار کیا جائے، دور دراز علاقوں میں ٹیوب ویلز پر ایک کی بجائے دو آپریٹرز کی تعیناتی کے فیصلے پر جلد عملدرآمد کیا جائے۔